20100131

En Ourense

Ou sexa, aquí á beira...
'Feijóo:"Quedó claro que este no es un partido de caciques"'
'La dinastía Baltar derrota a Rajoy y a Feijóo en el PP de Ourense al conquistar la presidencia provincial'
Ambas frases forman titulares dunha nova (parte dela, en internet). Casan entre si?

Escudo

Aparecu onte na prensa a nova de que a Aduana ten outra vez na fachada o escudo preconstitucional. A cousa non é nova, pois está no blog dende hai tempo, e xa levaba algún maís cando me decatei do tema.

20100130

Unha pequena historia en tres cadros




A raíz do anuncio de prensa da proba dun novo barco de Gondán, buceei hoxe pola web dos asteleiros para obter uns cantos datos e poder presentar a traxectoria do asteleiro das Figueiras dende o ano 1969, en que comezou a construcción de barcos con casco metálico (a abrangue a web corporativa), ata hoxe.
É un pequeno resumo de tonelaxe construído ano por ano e acumulado, e o número de barcos, a traverso do que se pode seguir a historia recente duns asteleiros que comezaron a súa labor na década dos vinte do pasado século, incluíndo a comprensión dalgúns avatares da empresa, seguindo a historia da propia web corporativa (por exemplo, o comezo das exportacións dun par de anos antes da caída do número de unidades en venta total, o que significa unha previsión exportadora ante a caída de demanda interna española, a especialización, etc).
A ter en conta que as imaxes pódense ampliar e que nalgún gráfico falta algún ano, no que non aparece na táboa a disposición na web ningún buque como construído.
A anterior entrada sobre Gondán no blog, a botadura do Edda Frende)

Dous meses

É o que lle queda ó alcalde para resolver o tirado das cumbreiras que lle impuxo a xustiza. Dous meses que, en caso de non facelo, suporán o comezo dunha multa mensual de 1 200€ ata que por fin o faga. é dicir, a situación precipítase, arrastrada dende varias corporacións anteriores, pero tocoulle cumprir a el. E cumprirá ou iralle ó peto.

20100129

Unha observación sobre o estado das árbores


Unha foto de observación sobre o estado do tronco das árbores que estes días se cortaron na rúa peonil.

De novo, o ISM

Cando comeza unha polémica, o normal é que non pare de xeito inmediato, senón que coletee, e que saia á luz novos datos. Así parece estar a pasar co ISM, que saiu no blog hai un par de días e suscitou aclaracións en forma de comentarios sobre a súa situación. Agora volta a saír na prensa, quizáis do xeito que tería que ter saído en principio: cunha aclaración do propio ISM.
Como aparece nun comentario da entrada anterior, o ISM está en realidade 'morto' dende os pactos de Toledo, hai agora uns vinte anos, nos que se acordou o seu desmantelamento (ó igual que outros institutos semellantes para outras áreas laborais) e o traslado dos súas funcións ó INS, que aglutina as mesmas funcións para a xeralidade dos traballadores. É dicir, trátase dunha racionalización de servizos xa acordada hai moito tempo, e máis ben o inexplicable é que siga existindo vinte anos despois. Dende os pactos de Toledo téñense ido reducindo postos de traballo no ISM, pero sen rematar de integralo totalmente. Agora, en Ribadeo, preténdese dar ese paso de integración, o que non significa que leven o servizo para outro lugar, senón para outra institución, quedando en Ribadeo pero noutra oficina, a do INS.
Despois, rodeando os feitos, está a política. Pero eso xa é outra cousa.
Sería moito pedir, outra vez, que a transparencia nas institucións fora a norma e non a excepción? As ventaxas son evidentes, comezando porque as administracións, políticos e cargos diversos, verianse na obriga de facer as cousas cunha visión máis xeral e tendo máis en conta a todos os administrados.

20100128

Do tempo


De novo, críticas ós meteorólogos sobre a previsión do tempo. Aparecen polas últimas choivas a fin de semana. Pero xa van sendo unha crítica periódica, ben polos hostaleiros, polos políticos ou por quen toque no momento.
Aquí xa teño deixado algunha vez a comparación entre as previsións de meteogalicia e o instituto meteorolóxico nacional, e como toda previsión, ver que soe haber diferencias; ás veces, maiores, ás veces, prácticamente nulas.
As comparacións, cando as pode facer un mesmo vense mellor. Deixo tres ligazóns para hoxe pero tamén para calquera outro día:
http://www.tutiempo.net/Tiempo-Ribadeo-E27500.html, a ligazón da beira
http://www.aemet.es/es/eltiempo/prediccion/localidades/ribadeo-27500, da axencia española de meteoroloxía
http://www.meteogalicia.es/web/predicion/localidades/localidadesIndex.action# , de meteogalicia (aquí, hai que sinalar despois Ribadeo)
Parta hoxe en concreto, as prediccións de máxima e mínima son abondo achegadas nos tres casos, entre 12 e 3 ou 11-4ºC, pero para mañá xa se apartan un pouquiño máis: 12-8, 12-7 e 10-8ºC. Efecto quizáis de que as previsións son menos exactas cando nos apartamos da data que estamos a prever, ou de diferentes datos e sistemas de previsión. Así, por exemplo, nas dúas estacións meteorolóxicas de Ribadeo, na de Pedro Murias, agora mesmo hai unha temperatura de 2,8ºC, e na do IES Porta da Auga, de 5,7ºC, unha diferencia apreciable.
O mesmo tratamento se podería ver no vento, sendo unha cousa máis variable que a temperatura, e que polo tanto pode inducir un erro maior, e asemade coas outras variables meteorolóxicas.
Polo momento, quedamos cunha nova vaga de frío, e as montañas que se ven cara ó fondo da ría, cara ós Oscos, nevadas (aínda que a foto foi da nevada anterior, non desta)

20100127

Instituto Social da Mariña

Na foto, o nivelado da base do peirao de Mirasol, tomada a semana pasada.
Alerta UPRi de que Ribadeo está a piques de perder a delegación do ISM que mantén na Casa do Mar, e propón tomar medidas preventivas. É de supoñer que a información sexa certa e que se teña pensado pechar a curto prazo, e non sexa un bulo. De ser así, sería un momento de levantar vontades para manter a delegación da institución, e non perdela como tantas outras cousas.
A nota de prensa lévame á reflexión sobre como se vai transmitindo a información dende as institucións ó pobo, algo que cada vez parece máis opaco en orixe nestes tempos que corren (despois dunha tempada de avance democrático na que se desfixo un pouco a opacidade), co que as decisións tomadas nas alturas non deixan tempo a reaccionar e menos aínda á participación. Pero tamén por eso, da que pensar a posibilidade e existencia de bulos diversos debido á desinformación. E así, boto de menos na noticia a petición de confirmación oficial e aclaración do que se pretende facer: non dubido que se se tenta levantar á sociedade para xerar unha oposición ó desmantelamento do ISM ribadense, se teña a seguridade de que tal cousa vai pasar, pero nese caso, deberan saberse, e polo tanto dicirse, tamén o por que e o como para ter un panorama completo do que está a suceder. Entre outras cousas, porque Ribadeo non está illado do resto de Galicia ou do estado e o ISM é supramunicipal, polo tanto non debera encadrarse só nunha xestión de tipo municipal, senón de tipo máis amplo, e o enfoque dado á protesta, segundo o por que e o como iniciais pode ser ben diferente. Fai falta lembrar aquelo de 'información é poder'?

20100126

Sen Nenó

Únome ó sentir de moitos dando a despedida a Nenó, José Duarte Díaz, concellal en Ribadeo dende os oitenta, o máis antigo da actual corporación. Pero non por eso, senon porque coido que era unha boa persoa.
A nota do concello.
A nota da COPE.
Entrada na Galipedia.

Adeus ás árbores

Onte a mediodía apareceron cortadas as árbores da rúa peonil. É pouco o que tarda en facer unha tala de árbores novos, e abondo o que tardan en medrar. É certo que algunha das árbores xa fora arrasada por vándalos, pero en xeral aínda fornecían unhas florificacións curtas pero fermosas.
Xa non.
A cousa ven a sumarse á poda de árbores na zona do cemiterio comezada en outubro, e alomenos a min lémbrame a pola/tala de comezos de década no xardín, na que boa parte das árbores de grande porte que alí había secaron despois de ser cortado o tronco de tal xeito que non deixaba ningunha rama visible, ningunha posibilidade de supervivencia.
Tamén contrasta co anuncio de posta de árbores na zona de estrada cedida por Fomento, e fai preguntarse cantos anos estarán as árbores vivas antes de seren cortadas.
--
Nota posterior:
Despois de falar con varias persoas, xa sei a causa da tala: unha enfermidade que xa secara algunha das árbores, a gomose, e comezara a atacar xa o resto. De feito, vin a sección dun tronco cortado e xa estaba seco na súa meirande parte. Espero recibir en días próximos un informe que será colgado como artigo con referencia a este.

Haití, de novo

Unha iniciativa do alcalde pretende acoller nenos haitianos en Ribadeo de xeito transitorio. Os poucos detalles que da a nova de prensa do concello sitúan a iniciativa en algo factible, se ben non de xeito inmediato. Un grao de area máis no tema da catástrofe haitiana, que non pode facer esquecer a cuestión de fondo: se Haití non fora maltratado a nivel internacional durante tanto tempo, a súa poboación non tería sufrido tanto tamén no terremoto. Xapón, abondo máis superpoboado que Haití, ten terremotos de índice semellante que pasan prácticamente desapercibidos, sen danos entre a poboación, no medio dunha estrutura capaz de sortear crises maiores. Si, a diferencia agora está no grao de desenvolvemento, pero as causas desa diferencia levan arrastrándose moito moito tempo.

20100125

Programa do antroido

Aínda falta para o antroido, pero os programas xa están listos. O título do post, antroido, é como eu o chamei sempre, pois coido que entroido é máis ben cara ó sur (aínda que nos diccionarios sexa o termo preferido), e aquí o nome que xa estaba sendo usado sobre todo era o castelán, carnaval (ver o parágrafo oito de Antroido Ribadeo 1997).

20100124

1800 €, 3/4 de entrada

Ise foi o resultado do concerto en favor de Haití.
O listado de obras e as verbas de Suso López:
Libertango - A.Piazzolla, interpretada polo Grupo de profesoras/es da EMMeD de Ribadeo
Casiñas brancas (habaneira de Ribadeo) - Tradicional, por 'Moitas máis que dúas piano ensemble'
Halo - Beyoncé, polo Grupo de Danza da EMMeD de Ribadeo
Divertimento KV 213 (1º mov) -W.A.Mozart, polos Chiripitifláuticos
Cançao (tradic. brasileira) e El cachimbo (tradic. chilena), polo Grupo de guitarras da EMMeD de Ribadeo
My way (Frank Sinatra) e A grande evasión (E. Bernstein), por Os Clarinotas
What a wonderful world - George David Weiss e George Douglas, polo grupo de metais da EMMeD de Ribadeo
The Batman theme (Danny Elfman) e Dinamita (A.Amigo), pola Agrupación instrumental da EMMeD de Ribadeo
Can't help falling in love (con arranxo de George D. Weiss), polo Grupo de profesoras/es da EMMeD de Ribadeo
... no díptico:
En ningunha das programacións didácticas das materias que se imaprten durante este curso 2009-2010 na Escola Municipal de Música e Danza (EMMeD) de Ribadeo aparece a palabra Haití. Tampouco o facía, por desgraza, no noso día a día até que na tarde-noite do pasado martes a forza da natureza colocaba a un dos paises máis pobres do mundo (8 de cada 10 haitianos/as viven na pobreza) nas portadas de xornais e nos minutos d emáxima audiencia dos informativos. Aí leva dez días, algo curioso e chamativo nunha sociedade que gusta das noticias de consumo rápido e "descafeinado".
Haití era un descoñecido. Os seus nove millóns de mulleres e homes, nenas e nenos, a súa miseria diaria, o soño frustrado de ser o primeiro país independente de América Latina e outras moitas das súas características pasaron desapercibidas para nós até que dende a pasada semana unha marea de solidariedade anega o mundo. Fondos chegados de ducias de gobernos e institucións e aportación individuais que se canalizan a través das ONG's tratan de salvar vidas, de recuperar corpos de entre os cascallos e de restablecer a "normalidade" tanto en Porto Pŕincipe, ca capital, coma no resto de localidades do país.
Con actitudes coma estas, mobilizándonos só cando aparecen as máis duras catástrofes, demostramos que o ser humano é hipócrita por natureza. Pero cando esa hipocresía se canaliza a través da música cobra outra dimensión: a da esperanza. Este concerto ponse en marcha conscientes da hipocresía anterior pero coa confianza de que os acordes qu ehoxe van escoitar no Auditorio Municipal Hernán Naval resoen máis aló deste 22 de xaneiro. Que a solirariedade que esta noite nos moveu para estar aquí permaneza viva cando Haití desapareza dos titulares dos xornais e dos informativos da televisión que fique no noso recordo o seu sufrimento diario e do tantas e tantos outros noutros recunchos disto que chamamos mundo. Suso López.
Sobre Haití.

Reis 2010

Decátome de que non deixei constancia do programa de Reis. aínda que demasiado tarde, déixoo á beira .

Visto hoxe en Ribadeo


Un pequeno paseo perto da ría da moito de si (xa non se pode dicir a carón da ría, que en boa parte do recorrido non queda á beira do camiño):
A primeira, as novas escaleiras de baixada a Cabanela dende a Atalaia, aínda en obras, infrastrutura que facía falta remozar, ó contrario do ascensor.
A segunda, unha árbore decorada con botes de bebidas, baixando a Mirasol, nunha estampa que parece lembrar o Nadal.
A terceira, unha porta na valla de Mirasol, cerrada que eu saiba dende que se fixo a reforma nese lugar (xa foi reformada aí a valla), e agora aberta (tampouco sei o por que)
E por último desta selección (hai outras fotos que sairán máis adiante a conto doutros temas), un grupo de bañistas con neopreno no entorno das escaleiras dos bloques. Para ser a media mañá dun día no que os termómetros marcaban 10ºC, non está mal ...



20100123

De artigos

Despois de pasar unha ollada polas novas do día, atopo dúas entradas de blog que non din o mesmo, sobre política (e en particular aplicable á política municipal), ambas en castelán (aínda que xeradas ambas en Galicia e me consta que ambos autores non teñen o mesmo enfoque sobre o galego) que coido debo pasar por riba das novas 'tradicionais' (que irán noutro momento) e facer contraste entre elas. Aquí as deixo:
¡Ay, si las ranas votaran!
Menos usted y yo, todo el mundo sabe...

"XXI Curso de verano de la Fundación Luis de Trelles" en Ribadeo

Luis de Trelles foi o fundador da Adoración nouturna española, e este verán (do 30 de xuño ó 4 xullo) terá lugar en Ribadeo un curso, o XXI, que leva o seu nome. Para ir coordinando o tema creouse un blog, con varias entradas xa na actualidade, a parte da páxina adicada á fundación Luis de Trelles.
Espéranse máis dunha centea de asistentes.

20100122

As obras do plan E 2010

Remato de recollelo da páxina do concello (as ligazóns que aparecen e o comentario final son meus):

SUPORÁN UN INVESTIMENTO DE 851.000 EUROS
Obras do plan E 2010
22/01/2010
A xunta de voceiros aprobou por unanimidade os 10 proxectos que se realizarán nos vindeiros meses con cargo ao plan E 2010. Esas obras serán ratificadas na xunta de goberno prevista para o vindeiro luns 25 de xaneiro.
O alcalde de Ribadeo sinalou que "nesa xunta de voceiros consensuamos os proxectos, as obras, as inversións que o Concello de Ribadeo realizará con cargo a este plan E 2010. Os técnicos alí presentes explicáronnos a todos os portavoces cómo fixeron para adaptar todas as propostas consensuadas ao diñeiro dispoñible. Houbo que facer algunha modificación ou algunha obra que non puido entrar e quedamos por unanimidade en deixalas para a seguinte remesa de diñeiro público que poida vir para este efecto, serán as primeiras prioridades para a no ano seguinte". Fernando Suárez engadiu que "en todo caso agora que aprobamos por unanimidade estas propostas serán ratificadas nunha xunta de goberno prevista para o vindeiro luns e a partires de aí enviaremos toda a documentación e todas as solicitudes formales á Subdelegación de Goberno para seguir coa tramitación e empezar a contratar as obras".
O plan E 2010 destiña a Ribadeo 1.065.000 euros, dos que arredor de 851.000 van para eses dez proxectos e 213.000 euros serán para a financiación de gasto corrente. A relación de obras do plan estatal para o emprego 2010 é a seguinte: reforma interior e eliminación de barreiras arquitectónicas na Casa do Concello de Ribadeo (104.484,97 euros); ampliación da rede de saneamento municipal desde a zona de Igrexa ata o colector existente en Piñeira (80.065,35 euros); conexión da rede de saneamento do parque empresarial de Ribadeo á rede de saneamento municipal (163.000 €); construcción da nova depuradora de augas residuais no lugar de Vilela (60.000 €); instalación de grupo electróxeno no Hospital Asilo de Ribadeo (20.000 €); reforma interior e eliminación de barreiras arquitectónicas na antiga oficina de turismo de Ribadeo (30.000 €); mellora e substitución do alumeado público das rúas: Avenida de Galicia, José Vicente Pérez Martínez e Avenida de Asturias (175.000 €); obras de adecuación interior dos vestiarios do campo de fútbol municipal (83.000 euros); obras de recuperación no parque de San Francisco (50.000 euros) e mellora das zonas transitadas por peóns nas áreas recreativas de Santalla e Vilaselán (86.254,67 euros).

Como foi indicado na Mesa de Asociacións, un conxunto máis de accións que non contan cos veciños máis aló do anuncio a posteriori, unha volta posta de acordo os grupos políticos do concello. E un conxunto de accións nas que un investimento pensado en boa parte para potenciar a competitividade se usa para obras das tradicionais.
Algunhas ligazóns do plan E en Ribadeo:
Plan E 2009; (2, 3, 4, 5)
Plan E 2010; (2)

Obras para unir e separar Institutos

A nova de que foron 60 as empresas que se presentaron para realizar as obras no actual IES Dionisio Gamallo Fierros deixa un pouco pensando o por que de tantas empresas. Hai que lembrar que, sen construír pabellóns como neste caso, as obras do cuartel da Guardia Civil viñan publicitadas na prensa por máis dos 2,25M€, e as obras que na actualidade e dende hai uns anos están paradas no actual CIFP Porta da Auga (o de F.P., non o IES Porta da Auga que se fundirá co Gamallo para dar un novo centro que ocupará o que é actual Gamallo e as obras previstas) non tiñan aparentemente un orzamento tan favorable, e non obstante non recibiron tantas ofertas.

Falando da ría e da súa consideración futura

Onte foi inaugurado o centro de interpretación da ría, en Castropol. É de esperar que de aí xurda unha mellor comprensión do que a ría significa, e que redunde nunha mellor consideración e máis coidado no seu trato. Ademáis, houbo verbas relacionada co tratado na última xuntanza polo momento da Mesa de Asociacións, pois insinuouse a posibilidade de poñer bicicletas eléctricas a disposición dos visitantes para o recorrido da reserva, en consoancia coa petición de dinamización das bicis xa existentes en Ribadeo coa marcación de carrís, e non só cara ó camiño da costa, senón sobre todo no interior de Ribadeo. Mentras, por cuestións de política, vemos como de novo non se usa na parte asturiana o nome de ría de Ribadeo, nun novo episodio da caza e derribo que se leva adiante dende hai uns cantos anos. Na parte asturiana, si, pero tamén polos representantes galegos que asistiron, segundo deixa refrexado a Voz. O do nome tamén foi algo que se tratou na xuntanza da Mesa de Asociacións... En ambos casos, agora tócalle actuar ó concello.

20100121

Fila cero no concerto da Banda de Ribadeo en favor de Haití

Banco Pastor, nº conta: 0072 0207 11 0000104948. O concerto, mañá.

Manifestación en Santiago

Hoxe haberá ribadenses manifestándose en Santiago en contra da nova normativa sobre as linguas. Coido que a miña postura está clara en contra dela, pero mellor que argumentar direitamente, prefiro deixar dúas ligazóns, unha ao borrador e outra ós comentarios da Real Academia Galega.
Como outras veces, despois de ver o derradeiro post de im-pulso, deixo aquí a ligazón (e ten máis sobre o tema), e ademáis tomo nota primeira dos artigos de última hora no El Progreso , El País Público e La Voz de Galicia.

20100120

Sobre o pleno de 20100118 (II)

Sobre o pleno de 20100118, parte 1ª.
O punto seguinte foi a ordenanza de verquidos, cuxa actualización parece ser que esixe a Xunta. é neste punto onde se aplicou o que dicía UPRi días atrás na prensa de duplicidade de cobro pola taxa de depuración, mantendo un pequeno turno de explicacións, rematando cunha votación de 8 a favor contra 5 en contra, cunha aclaración do PP de que aceptaba a ordenanza tendo en conta que cando fora asumido o control da xestión de verquidos pola xunta habería que reprantearse as taxas, algo co que o BNG estivo de acordo.
No punto 7º deuse a unanimidade nas licenzas de 1ª ocupación propostas.
Foi entón cando se fixo a presentación das dúas mocións de urxencia. A primeira, polo PP, sobre o regulamento do asilo, para facer unha variación no punto que trata sobre as admisións. A raíz do caso de dúas persoas concretas, solicitaron a urxencia e propuxeron variar a necesidade de estar empadronados alomenos durante os 2 anos anteriores para pedir praza, esxpoñendo que Ribadeo é terra de emigración e houbo xente que son ribadenses pero que pasaron os últimos anos fóra. Considera o alcalde que habería que falalo antes para ver os termos, pero razónase que é unha primeira aprobación e logo hai a exposición pública de 1 mes, polo que se poden modificar cousas despois. É aceptada a urxencia e debátese, presentando a alcaldía o que chama un 'informe rápido' do asistente social que di esixir máis que o que di o PP, 10 anos + a baixa consular para estranxeiros. Apróbase con 9 votos 4 abstencións (BNG)
A outra moción de urxencia foi por parte de UPRi, sobre a comida dos maiores no piso tutelado de Rosalía de Castro, 10,1º. Usan os servizos do piso 7 persoas, 6 homes e 1 muller, e alega UPRi que só 2 ou 3 persoas comen o catering, pedindo que as comidas se fagan no piso e que se revisen a diario os menús a parte dos do piso tutelado. A urxencia é aceptada, pero con diverxencia de opinións do que pode ou non resultar urxente entre o PSOE e o PP. O debate complícase por varias razóns, entre as que están a discriminación segundo está a proposta entre a xente do piso tutelado e o resto de receptores do catering, o contraste das queixas por aprte dos servizos sociais, a diferenciación entre queixas de calidade e queixas por motivo de paladar, o refrendo de días pasados realizado polo colexio de médicos provincial sobre o menú, a oferta realizada hai xa tempo por parte do asistente social de cambiar o menú se non gustaba e se podía, ... ó fin, queda só sobre a mesa a segunda parte da proposta, a revisión continuada. Queda a cuestión de quen e como o revisa, sendo votado por 9 votos a favor e 4 abstencións (BNG).
Este último punto deu lugar a varios momentos curiosos. Por exemplo, unha proposta irónica de que se levaran os menús do día ó pleno para o seu testado. Eso si, por sorpresa.
Eran nese momento ás 10 e 10, e comezou o turno de rogos e preguntas.

20100119

CONCERTO BENÉFICO DA EMMDR A FAVOR DE HAITÍ

O VENRES 22 ÁS 20.30 HORAS NO AUDITORIO HERNÁN NAVAL

Organizan: Concello de Ribadeo, Escola Municipal de Música e Danza e as asociacións Amadores da Música e Musiqueando.

Entrada: 5 €

Fila 0: conta aberta no Banco Pastor.

O diñeiro recadado irá destinado á Cruz Vermella

Colabora…todo o que poidamos facer é importante.
Anteriormente no blog, aquí.

Sobre o pleno de 20100118

14 persoas, no punto de maior ocupación, estiveron onte no pleno como observadores.
Os puntos, quitado o de aprobación de actas anteriores ó comezo e rogos e preguntas ó final, foron sobre resolucións de pago da alcaldía, deixación sen efecto de resolución anterior sobre a travesía cedida por fomento, e o acordo de aprobación do proxecto modificado sobre o mesmo tema, a aprobación da taxa do cemiterio, a taxa da ordenanza de verquidos e uso de sistema público de saneamento en baixa, as licenzas de primeira ocupación e dous temas que se debarteron como mocións de urxencia de urxencia, unha variación do regulamento de réxime interno do hospital asilo e outro sobre a revisión de comida para maiores.
No primeiro tema fixéronse diversas preguntas sobre facturas aboadas, incluídos algúns desacordos sobre a forma de presentación das mesmas.
En relación ó segundo e terceiro, sobre o proxecto da travesía, díxose que era a proposta da mesa de contratación tras conseguir a variación das anualidades polo concello, que agora estarían para 2010 e 2011, e ter observado diversos erros no proxecto anterior. Foron aprobados ambos con 8 votos a favor (BNG e PP) e 5 abstencións
En canto a aprobación da regulación do cemiterio, dende o comezo houbo unha distinción entre a necesidade da 'literalidade' normativa e a fiscalidade, pero a regulación é unha e había que votala por xunto, segundo aclarou o secretario. Díxose que existía lista de espera para os nichos, e falouse da necesidade de poñer un freo para a consecución de nichos, defendendo os dous anos de empadroamento en Ribadeo. Pasouse ó debate, onde se falou das diversas porcentaxes das subidas e de que non era tanta a urxencia por o aumento de incineracións. Asemade, tamén se baraxaron diversos outros números. Así, o aumento previsto de 1 101€ a 1 450€ nos nichos de 3 ocos. A xustificación final por parte do alcalde como achegamento ó custe dos servizos, cando se parte dunha base reguladora moi baixa, non surtiu efecto, e despois da negativa do PP á suba de taxas, que foi aplaudida por parte do público, a proposta foi rexeitada por 4 votos a favor e 9 en contra.
(2ª parte)

20100118

Concerto benéfico en favor de Haití

Despois de saber que se ía celebrar, hoxe houbo unha rolda de prensa e foron publicadas notas polo concello e polo Blog 'recuncho da escola e da banda' sobre o concerto, previsto para este venres, 22 de xaneiro, ás 20:30 no Cine-teatro.

Nova xuntanza da Mesa de Asociacións de Ribadeo

O sábado tivo lugar unha nova xuntanza da Mesa de Asociacións. Copio e pego a nota de prensa dente o blog de O Tesón, non sen antes lembrar que hoxe hai pleno, do que non foi ampliamente difundida a orde do día.
O pasado sábado 16 tivo lugar unha xuntanza da Mesa de Asociacións co Alcalde. Asistiron 14 asociacións, entre elas, 12 de veciños, estando convocadas tódalas asociacións inscritas no rexistro do concello.
Nas tres horas que durou foron tratados os temas propostos na reunión previa entre asociacións de veciños mantida o sábado anterior, incluíndo o estatuto de participación cidadá, información sobre a reserva da biosfera, a accesibilidade a Ribadeo e o carril bici, o xulgado de primeira instancia, a fachada de Ribadeo á ría, o estado actual da polémica polo desmantelamento do hospital da costa, a central de tensión elećtrica polo polígono industrial, o centro de Alzheimer, o cumprimento da normativa de depósito sobre a tala de madeira nos montes e algún tema máis polo medio, como o incumprimento da normativa sobre o nome da ría.
A lembrar que a Mesa de Asociacións é un intento que xa ten anos de cubrir un oco na relación entre concello e pobo, que tende a armonizar dita relación pola continuación periódica de xuntanzas. Naceu no mandado municipal anterior, a partires dunha chamada do Tesón a un grupo de asociacións, e se ben non ten un estatuto oficial, representa un avance que se pretende que continúe a traverso do estatuto de participación cidadá.
Respecto ó estatuto de participación, en xuntanza de 2008 o Tesón presentou un borrador á sasociacións, que posteriormente foi trasladado ó concello, e que agora devolve para o seu estudo polas asociacions coa vista posta no seu futuro pase á aprobación polo pleno. A destacar que hai 20 anos foi aprobado de xeito previo un estatuto, non chegando á súa aprobación final e posta en marcha, e tendo sufrido cambio a lexislación relativa dende aquela.
As asociacións ofreceron ó concello o seu apoio para a recuperación do xulgado, ó tempo que pediron ó alcalde que se poña mans á obra para recuperalo despois de catro décadas.
En canto ós outros temas, o concello tamén recibiu apoio e petición para rematar co desuso da normativa oficial sobre o nome da ría de Ribadeo, dentro da discusión sobre a Reserva da Biosfera. Tema relacionado tamén foi o estado de enaxenación á Ribadeo da fachada marítima do casco urbano, tan cambiado nos últimos anos.
En canto ó acceso ó centro urbano, presentouse o feito de que a humanización das rúas non pode obviar que os coches de quen non vive no casco urbano necesitan aparcamento, e que para desprazarse no casco sería convinte un trazado de vías que permitira facelo por medios alternativos, como a bicicleta.
Como é común, esta nota de prensa está feita a partires dun resume da xuntanza, realizado por O Tesón.

20100116

Pleno o luns

De novo nos enteramos a cidadanía da existencia dun pleno por un punto concreto que sae na prensa. Neste caso, arredor da recuperación de nichos por parte do concello (a lembrar que os lugares no cemiterio son de propiedade municipal, sendo cedidos por arrendamento de pago único a 99 anos, o máximo permitido pola lei sen ceder dereitos de propiedade, ós que se soe chamar 'propietarios', pero que non o son) ante a que din saturación do cemiterio. Eu non vexo polo momento tal saturación, pero supoño que o concello terá previsións (que, nese caso, debera facer públicas).
De calquera xeito, a cuestión non é o punto concreto do cemiterio, senón a escasa difusión da convocatoria do pleno, que tiña a esperanza que por esta vez aparecera na web do concello cos puntos a tratar. De aí a importancia de seguir insistindo no mantemento de relacións entre as asociacións e o concello, para tentar aproximar a xestión ós xestionados, estando nestes momentos reunida a Mesa de Asociacións co alcalde.

20100115

O triunfo dunha explotación

Por medio de 'Ángel de Olavide' entérome dunha nota de onte do ICEX, na que se da nova ampla sobre Acueo, como empresa exitosa no exterior, ó tempo que da tamén ó final unha pequena nota sobre a producción ostrícola galega: "Galicia produce anualmente dous tipos de ostra, a plana ou europea e a xaponesa, especie para a que os produtores galegos rexistraron o nome comercial de "ostra rizada". A traverso de máis dunha centea de instalacións, esta comunidade ten exportado –entre xaneiro e xuño de 2009– 578,3 toneladas de ostras –88,5 por cento do total das ostras españolas exportadas– por valor de 2,3 millóns de euros a países como Francia, Italia e Portugal principalmente." (na mesma nota aparece Acueo cunha producción de 55 t)

A petición de algo que xa é

Parece (a nova está sen confirmar) que empresarios dun pub pediron ó concello a declaración da zona de Pasarón y Lastra zona de baixa sensibilidade acústica. Como nunca deixou de selo (nunca se lle deu unha clasificación), a petición é cando menos, curiosa. Precisamente está pedido dende hai tempo que o concello a cambie. E, dende aquela, un local novo na zona tivo que retirar, por orde xudicial, a música amplificada que tiña, pero non por ter cambiada a cualificación da zona, senón por concesión mal feita por parte do concello no mandato anterior. Agora estase a plantexar a renovación doutro local próximo, e o anuncio coincide o día despois da saída en prensa da causa contra Balbino, relacionada co tratamento do ruído no concello.

Mirasol e o futuro do porto de Ribadeo

Mentras que o conflito da madeira fai que non saia pasta de papel de Mirasol, parece que se desatasca a posibilidade de obras na liña de Feve entre Ence e o Musel, de xeito que a finais do 2010 estará rematada. Con elo, é presumible que volte a polémica pola nave en Mirasol, se non direitamente para tentar de novo a súa construcción (reitero o que xa dixen noutras entradas, que a nave non se construiu por razóns diferentes á presión exercida, aínda que esta poidera ter contribuído a axilizar a decisión) si alomenos para tentar algún tipo de compensación pola non construcción.

20100114

O carneiro alado de Ribadeo

Hoxe xoves sae na prensa unha ampla controversa sobre a cesión de diversas pezas ó Museo Provincial, entre ista institución e os herdeiros de Álvaro Gil Varela. No medio da polémica unha peza, o carneiro alado de Ribadeo, que segundo parece apareceu nun dragado da ría no 1945. Unha peza interesante da que hai algunha cousa na rede, da que fago unha selección:
http://www.mundoantiguo.org/index.php?option=com_content&view=article&id=79&Itemid=62
En Google Books, e outro no mesmo lugar.
Seguemento da controversia na Voz:
http://www.lavozdegalicia.es/hemeroteca/2007/01/06/5430792.shtml
http://www.lavozdegalicia.com/lugo/2009/03/26/0003_7614989.htm
http://www.lavozdegalicia.es/amarina/2010/01/14/0003_8225763.htm
http://www.lavozdegalicia.es/amarina/2010/01/14/0003_8225761.htm
http://www.lavozdegalicia.es/amarina/2010/01/14/0003_8225766.htm

Nota de prensa

Remato de enviar a seguinte nota de prensa:

Nota de prensa

A raíz dunha noticia publicada sobre a denuncia interposta por min sobre Balbino Pérez Vacas, quero aclarar o seguinte:

A denuncia cursada é por non tramitación de expedientes despois de actuacións diversas das forzas de orden público en relación ó ruído causado por diversos locais.

Os expedientes correspondentes foron pedidos e denegados, reiterando logo a petición xudicialmente e sendo obrigado o concello a entregalos, xa ben entrado o mandato seguinte ó de Pérez Vacas. A entrega realizada polo concello constou dun único papel, onde se di que non hai constancia no concello de ningún trámite dos expedientes pedidos. Foi isto último o que desencadeou a decisión, meditada e tomada despois de tentar falar coa outra parte o mércores 20 de maio do pasado ano.

Ata aquí, os feitos. Outras cousas que se din nos xornais non están relacionadas direitamente coa denuncia, aínda que se trate de temas sobre ruído, e polo tanto, deben de ser referidas a parte. Así, é certo que houbo algunha xuntanza sobre ruídos no seu mandato, como unha no salón de plenos da que non se quixo tomar acta a pesares de ser pedido, e que se tentou facer algún amaño. A comunicación dos amaños por facer nos locais tamén foi pedida e ata agora non subministrada. Sei que algún amaño si se fixo, pero da unha indicación do verdadeiramente feito que algún local segue sen saída de emerxencia, por exemplo.

Sen querer entrar en máis polémica, pois por algo está a causa no xulgado, cabe dicir entre outras moitas cousas que tanto antes como no período do mandato de Pérez Vacas foron presentados diversos escritos, dos que teño copia, nos que a miña sinatura en relación co ruído ía acompañada doutras moitas doutros veciños, ou que o tema de ruído, a pesares da baixada da movida en Ribadeo, segue sen resolverse como se puido ver no detalle de que mentras en Burela houbo polémica polo peche de locais ás 8 da mañá do primeiro de ano, aquí houbo locais que apagaron a música e cerraron cando se cansaron os donos, despois do mediodía.

Unha proposta para a tesourería do concello

Os pagos coñecidos á SGAE por parte do concello sobrepasan os 30 000 € (cantidade recoñecida en pleno hai tempo).
Poden evitarse? En parte, alomenos, si.
Como? Con uso de obras con licenzas libres.
Que é a SGAE? A Sociedade General de Autores de España é unha asociación que teóricamente se encarga de recadar para os autores asociados un canon por obras interpretadas, e que na realidade ten aproveitado toda interpretación sen demostrar que ten delegada á xestión de dereitos de autor e que estes están en vigor. Un exemplo delo, os 30 000 € citados, reclamados 'por xunto' e dicindo que era unha rebaixa en por ser nesas condicións.
E iso das licenzas libres, que significa? Ten licenza libre unha obra sobre a que xa non teña ninguén dereito, por tere pasado ó dominio público (ben por ter sido feita hai moito tempo, ben por ter cedidos os dereitos), ou obras con licenzas do tipo Creative Commons (é dicir, que pertenzan dalgún xeito á 'creación común', o que abrangue varios tipos de licenzas), con dereitos dos autores limitados, etc.
Hai certamente dificultades en aplicar sempre un mesmo esquema para reproducción ou interpretación de obras. Pero, cara á tesourería, non se trata de aplicar sempre un permiso de tipo licenza libre, senón de reducir o pago de dereitos dun xeito xustificado: unha boa parte das actuacións poderían seguir o esquema de uso deste tipo de licenzas, complementadas nalgúns casos con obras propias dos intérpretes. Tendo en conta, por exemplo, que as obras clásicas (excepto adaptacións modernas) están en xeral liberadas, pertencen ó dominio público, e polo tanto, poden se usadas pola banda de música de xeito libre e non ahi que pagar o canon. Así pasa tamén en xeral coa música tradicional ou con moitas obras como pasodobres de autores mortos hai longo tempo. Por outra beira, representacións teatrais de obras escritas por xente das mesmas compañías locais non teñen traspasada a xestión dos dereitos á sociedades do tipo SGAE, e con eses mesmos cartos, podería potenciarse por exemplo, a publicación dos libretos.
Outra cousa diferente é a imposición de temas a grupos musicais, ou a compañías de teatro visitantes con obras de repertorio con dereitos, por exemplo, que sinxelamente non é factible. Pero se tocan os seus propios temas, ou interpretan as súas propias obras ... pasar por caixa a parte non ven a conto.
Non teño datos da porcentaxe de aforro que podería terse de aplicar estas medidas, pero a SGAE tampouco, e a bo seguro compensa polo aforro, e, se o concello (tal como declarou hai non moito o alcalde) está a considerar abusivos os cobros da SGAE, coido que haberá que poñerse ó tema. É dicir, ir máis aló das verbas. Polo menos, esixir a demostración de que as obras interpretadas están baixo o paraugas recaudador da SGAE.
* Unha nota final: hai que ter en conta que aínda que a SGAE é unha sociedade que aglutina a maioría de cánones impostos deste tipo, non é a única, e a realidade pode ser máis complexa, pero tamén, e de xeito máis que proporcional, será máis complexa a actuación necesaria das asociacións pertinentes para cobrar .
* Outra nota: Ó longo da xeografía española xa se teñen dado casos de sublevación ante estes cánones con resultado positivo nos xulgados, mentras que polo contrario, quen se submete viu incrementados de xeito substancial os pagos a realizar no mesmo tempo.
* Unha terceira: a SGAE é unha sociedade opaca, que non amosa contas detalladas, e que trata de cobrar por calquera interpretación (esteña ou non protexida polo seu paraugas) ó longo de toda a xeografía española.

20100113

Actividades previstas da Banda de Música Municipal de Ribadeo / Amadores da Música no 2010

20100103 20:30 Auditorio Hernán Naval Concerto Aquí como en Viena
20100331 20:30 Auditorio Hernán Naval Concerto Semana Santa
20100516 20:30 Auditorio Hernán Naval Concerto Letras Galegas
20100724 20:30 Praza da Música XVI Festival de Bandas / Concerto día da Patria Galega
20100808-14 Colexio Publico Gregorio Sanz Campamento Musical
20100816 13:30 Praciña de S. Roque concerto S. Roque
20100908 13:30 Praza da Música Concerto Festas Patronais
20101120 20:30 Auditorio Hernán Naval Concerto Sta. Cilla
A notar que pode sufrir modificacións...

Sen grupo municipal de intervención rápida en Ribadeo


Segundo a nota de prensa sacada polo concello, esa vai ser a situación de Ribadeo ata a primavera. O alcalde bótalle a culpa á Xunta e establece unha diferencia con outros anos anteriores.
Sexa o que sexa, o Grumir, os 'chicos para todo' do concello, que teñen sacado moitas castañas do lume a nivel municipal, non estarán activos dende pasado mañá en diante nunha boa tempada.
A foto, do reloxo de Sol do cargadoiro, coa punta torta de novo (está tomada xa hai días)

Mirando cara ó ecoloxismo

"Por certo, ó final liberaron por fin ó voso colega manifestante López de Uralde". O comentario de pasada que me chegou insertado nun correo sobre outro tema referiase ó Presidente de Greenpeace (ou sexa, 'paz verde') en España, facendo un contacto entre el (e polo tanto Greenpeace), participante na manifestación contra a construcción dunha macronave no porto sobre a ría ribadense, e a AVV O Tesón, convocante da manifestación. De calquera xeito, non deixou de chamarme a atención a redacción do parágrafo por varias razóns.
A primeira, o de 'ó final'. Coido que estar retido 20 días, illado, cunha lei sacada da manga poucos días antes do cumio sobre o clima para permitir facer retencións de ata 40 días, sen ter usado en ningún momento a forza, sempre en acción pacífica, e máis ben ensinando ós gardiáns do cumio os seus puntos fracos, violando a policía noutros casos a liberdade de asociación das leis danesas e europeas, ... non é para comezar cun 'ó final'. A liberación, ise final, debera darse por sentado dende o primeiro momento. 'Ó final' só implica unha disfunción, algo que non viña a conto facer así pero logrouse, o que non é o caso respecto da liberación.
Outros aspectos que me chamaron a atención son digamos máis lúdicos: 'Ó voso'. Coido que López de Uralde, como calquera persoa, 'é súa'. En todo caso, calquera persoa é 'un pouco de todos', como ser social. Pero nunca debera catalogarse como 'noso' ou 'voso', como algo que se pode adquirir ou traspasar. E menos, se cabe aínda, cando se trata de encasillar a alguén nunhas ideas de defensa de todos (aínda que para defender a todos teña que enfrontarse a algúns)
'Colega'. A pesar dunha foto publicada na 'Comarca' de 20100109, pode dicirse que non coñezo á persoa da que estamos tratando. Coido que comparto algunhas ideas e algúns anhelos, pero non sabería dicir, por exemplo, se ten familia. Pode que me gustara poder chamarlle 'colega', pero a pesares do antedito, ou do respeto e o apoio que pode ter da miña parte ou da xente que conforma O Tesón, non me sinto como un 'colega'.
'Colega manifestante'. Se collemos e xuntamos o de 'manifestante' á verba 'colega', así limitada a verba, a relación entre López de Uralde e eu ou calquera outra persoa manifestante en Ribadeo na manifestación na que el estivo, achegariase máis ó que di o diccionario: parece que si, estivemos nunha acción xuntos, que é unha das posibilidades que contempla a definición de 'colega' por parte da RAE. Pero a verdade é que non sei nin como se enterou da manifestación.
Unha vez aclarado iso sobre unha persoa que estivo en Ribadeo e compartiu algún desexo connosco, coido que xa hai abonda información nos medios para ter claras varias cousas en relación ó seu encarceramento. Entre elas, resaltaría unha precisamente pola pouca relevancia que levou nas informacións: que o trato dado ós ecoloxistas na xuntanza de Copenhague non é moi diferente do que se lles da outras veces a eles ou a outros grupos que actuando acertada ou equivocadamente tentan poñer algo de cordura nas relacións humanas ou dos humanos coa natureza. Que trato?. Tentar de quitalos de enmedio porque molestan a quenes lles foi outorgado (ou colleron de por si) o poder de decisión no tema correspondente.
Outra cousa esquecida entre as informacións é que por desgraza é necesario a presión da prensa a posteriori dos sucesos para voltar as cousas ó seu cauce, en troques de que sirva de xeito previo a consulta á cidadanía, a súa implicación en problemas que lle afectan. Algo así como a normalización do dereito ó pataleo, que cando é abondo e prolongado, pode facer variar decisións anteriores.
Unha terceira, que os problemas quedan eclipsados polo 'glamour' ou a 'impresión' das noticias, primando a foto de quen decide por riba do que se decide, esquecendo ademáis xa non só a orde causa-efecto das cousas (neste caso, respecto da detención dun grupo de ecoloxistas), senón tamén pasando páxina moito máis rápidamente sobre as decisións (mellor, a falta de decisións) tomadas sobre o clima na xuntanza a alto nivel de Copenhague que sobre o propio feito da detención. Algo que, se ben pode ter servido para que 'ó final' remataran liberados os detidos uns días antes do prazo dado pola nova lei ad-hoc, tamén serve para trivializar unha decisión que non é, nin moito menos, trivial: a de non facer nada mentras que o planeta segue ó garete debido ás nosas accións anteriores, despois de primar un tipo de economía que lle da cartos a quen máis ten contrarestándoo con retirada de prestacións a quen máis as necesita.

20100112

Sobre as temperaturas: comparativa


Como anunciei na entrada anterior, sobre datos da estación meteorolóxica da Pedro Murias, que xestiona Luciano Zubillaga, collendo temperaturas máxima, mínima e media diaria do aire, adxunto unha comparativa dos nove anos da década no periodo 1-nov a 11-xan. (ver a parte premendo co rato sobre ela, e ampliar)
Sobre o tempo, nalgúns outros post anteriores: Altas temperaturas na auga. Hai que garantilo. 3ºC. Cambio de tempo en Ribadeo. Contrastes na prensa de hoxe.

Sobre as temperaturas


Este Nadal ten sido especialmente frío. Unha gráfica de temperaturas así o amosa (sobre datos da estación meteorolóxica da Pedro Murias, que xestiona Luciano Zubillaga, collendo temperaturas máxima, mínima e media diaria do aire).
Noutra entrada farei un estudo comparativo.

20100111

Sobre corrupción. Frases lidas

Escolma de frases de Tempos novos, nun debate con participación de Xaime Subiela (moderador); Rafael Martínez Castro, profesor de Filosofía na USC; María Bastida, profesora de Empresas na USC e membro do Consello de Administración da CRTVG; Antonio López, conselleiro maior do Consello de Contas de Galicia; e Xosé Manuel Sabucedo, profesor de psicoloxía social da USC.
"O suxeito da corrupción non son os políticos nin os empresarios. É a cidadanía. É a cidadanía a que reclama, vota, apoia e quere políticos que teñen prezo accesible, porque non confía nin confiou nunca na norma. Canto máis nos acerquemos á administación municipal ou autonómica, o problema agrávase".
"Se a corrupción sae gratis, seguirase cometendo"
"Din que distintos pensadores (...) que a peor corrupción é a da élite dominante, a do creador do opinión. Porque eses creadores de opinión transmiten a sensación de que o que non é corrupto é parvo"
"A estratexia para superar os niveis de corrupción sería que esta non compensara, que compensara a norma"
"O problema deste e doutros países non son as normas senón o seu cumprimento"
"Unha das posibles solucións fronte a corrupción é a transparencia"
"En última instancia o auténtico control é a sanción social"
"O cidadán que fai a súa declaración de impostos correctamente pode ter unha razoable satisfacción moral, que se traduza en que se converta nun cidadán máis esixente con respecto ao que se paga con eses impostos"
"(...) coido necesario identificar e polo tanto denunciar como prácticas corruptas moitos comportamentos que até o de agora na poboación se teñen como habituais"
"Hai unha cesión da soberanía das decisións a gobernos que están no oculto, que se expresan como xestión dos intereses de grandes corporacións, lobbies e grupos de presión"
"(...) non vale a moral do vespino, non pode haber unha serie de cidadáns que, dotándose de determinados vehículos, poidan transixir todas as normas do código da circulación"
"Pensar que a corrupción non ten saída paréceme preocupante porque entra no xogo dos corruptores. Os corruptores están interesados en dicir que o público non funciona"

Ante un novo pleno

Cabe a pregunta, por fin se saberán por parte de todos os veciños os puntos da orde do día? Haberá algún medio de ampla difusión dos mesmos? Ou, como ten pasada ata agora, non se saberá nin se hai pleno atra despois de pasado? Dirá algo a web do concello'
Coido que o pleno será o próximo luns (o segundo luns de mes, retrasado normalmente por diversas razóns ata o terceiro, e de xeito case tradicional en xaneiro) e teremos tempo de enterarnos.

Notas de prensa

Un novo incendio, xusto dúas semanas despois do que deixou para o arrastre un piso no xardín, esta vez nun baixo desocupado en Calvo Sotelo, no edificio de cabeceira da rúa.
O novo ano non traixo paz ó clube náutico: se o día 28/12 dicía que a ver se a asamblea do 29 traía a paz, agora xa está confirmado que non: un grupo de socios entregou un escrito pedindo a anulación.
Segue sen haber comentarios despois de que o Presidente Provincial do PP, M. Barreiro, pechara o proceso de substitución de J.C. Andina... e disto hai máis dunha semana. Un proceso que pretendía ser democrático foino sendo cada vez menos.

20100110

Lido hoxe na prensa. Frase curiosa.

"(...) pero non se enfade vostede, imos, confíe en nós. A liberdade está ganando a guerra contra o terror. Bonitas tetas, por certo."
En Público, escrito en 'Escáneres corporais', de José A. Pérez, columna que hoxe versaba sobre os escáneres a instalar nos aeroportos.

Un lugar e tempo achegados: Penarronda, hoxe


Ampliable...

20100109

Pepe Matamouros, patrón dos enfrontamentos

En tempos, xa lonxanos, xurdiu no que se ía configurar como España o mito de 'Santiago Matamouros'. Dende aquela, as cousas cambiaron. Tal parece mesmo que da reconquista pasaramos a unha especie de re-reconquista, na que serían os mouros os que quererían ocupar de novo Al-Andalus, a parte doutros moitos territorios.
Normalmente recibo por correo electrónico moitas presentacións, ligazóns a videos e demais. A maioría, a grande maioría, non os abro, Pero abro abondos como para detectar que moitos son repetidos (chegan por diferentes enderezos de partida) e, sobre todo, que hai unhas certas tendencias. Así, estase incrementando dende hai tempo o número de correos relacionados coa maldade dos mouros / 'árabes' / musulmáns, poñendo de manifesto o seu extremismo, as súas atrocidades, as súas ideas retrógradas, o odio a nós, 'inocentes occidentais', ...
O único contacto prolongado cun musulmán do que son consciente foi cunha persoa nova, nun cursiño de formación, no que tiña unha base abondo mellor que o resto ('cristiáns occidentais'), era alomenos tan intelixente como eles e tamén abondo máis traballador. Un caso pode ser unha anécdota. Certo. Pero tamén é certo que os que me chegan son 'casos' que son magnificados, cambiados de contexto, ironizados ou mesmo direitamente mentiras. Desto último, das mentiras, xa teño detectado algunha, simplesmente indo pola rede a facer as comprobacións pertinentes en documentos.
Quere isto dicir que todos os 'árabes' son bos? Evidentemente, non. Teñen os seus extremistas, igual que nós temos os nosos ou os xudeus os seus (ou os chinos, ou calquera outro conxunto humano). E, por moitas ideas que subxazan, tratamos con persoas, ás que hai que considerar. Deixemos de pensar nun 'Pepe Matamouros' actual que conduza os exércitos 'cristiáns' (chámalle se queres 'Presidente Bush' e ós exércitos 'occidentais', 'bós', ...) á victoria para pasar a moitos Xan Ninguén que conduzan ás sociedades a unha mellor convivencia.
Poñerse en lugar do outro, lembrar o noso propio pasado como pobo de emigrantes con constumes diferentes ós lugares de acollida, enfrontarnos ás verbas que se manexan (que bo título o de 'As cruzadas vistas polos árabes'), lembrar o que pode ser a desesperación, tentar comprender os pasos previos ós atentados, ...
Esta entrada queda incompleta. Terá unha segunda parte...

20100108

De bicis

Mentres que as bicicletas de Ribadeo están infrautilizadas e non promocionadas, 15 concellos galegos dispoñen xa dun sistema de arrendamento de bicis para os veciños. Mentras que en diversos lugares particulares e asociacións pedimos que se vaia instaurando o carril bici, as novas rúas humanizadas non son bicicleadas. Un apunte positivo neste panorama: un lugar para aparcamento de bicis no comezo da r/Calvo Sotelo, instalado hai non moito, únese ó que xa había nalgún centro educativo e ós 'postos de aluguer' sen usar.
Agora o alcalde parece que 'trae de Madrid' cartos a conta da Reserva da Biosfera. Potenciará este aspecto para 'humanizar a biosfera'?
Un engadido: remato de ver que existe un plan en Galicia para debuxar un mapa con vías alternativas. Poderemos dicir iso de 'por algo se comeza'?

20100107

Papá, ven en tren

Segundo parece, no 2012 seremos o país con máis km de AVE. Por iso, unha cita curiosa (Público, 20091227): "Non digo que teñamos que botar doce horas para ir de Sevilla a Madrid, pero entre iso e as dúas horas e media debera haber algo intermedio, máis asequible e que prestara servizo ás localidades menores. Total, na práctica, a maioría de cidadáns pode permitirse un ou dous viaxes de AVE ó ano ou nin iso. A cambio, homes de negocios e altos funcionarios úsano semanalmente, aínda que a súa comodidade e rapidez pagámola todos". Ó fin, se o AVE proporciona rapidez e comodidad, entre outras cousas tamén pode sepultar liñas tradicionais.
Despois de sere desacartada por responsables de FEVE a proposta dun AVE cantábrico días atrás, coido que sería bo aproveitar a coxuntura tanto para iniciar unha consulta ós posibles usuarios como unha valoración pública dos pros e contras dunha determinada opción ferroviaria na zona.
O tren ... unha infrastrutura que por outra parte pode dicirse que leva un retraso secular na zona, sen considerar mesmo opcións como o ferrocarril a Ponferrada dende Ribadeo que non se chegou a iniciar nin cando estaba en uso a liña á Pontenova-Vilaoudriz.
Así pois, o de 'papá, ven en tren' como orde substitutoria do 'papá ven en tren' como posibilidade exercida, en certo xeito terá que esperar e pasar a ser un futuro 'fillo, ven en tren'...

A conta do bookcrossing, pero non só

O vídeo a continuación é unha parodia que se ve alimentada pola filosofía do cruce de libros, e fronte a ela, do cruce de neuronas á noite. Sínteste recoñecido/a?

Por certo, que falaremos da zona bookcrossing da oficina de turismo, que xa sobrepasou de longo e hai tempo os 100 libros a disposición.

20100106

Para ti, que aínda usas Windows, un agasallo das súas Maxestades Os Reis Magos

Soft libre para windows ...

2010 aínda é o futuro

Un folio na porta dunha igrexa, un avance social? Porque iso foi o que vin esta semana na igrexa de Piñeira. ¿? Se o folio se refire á dación de contas da última festa da parroquia, significa que o domingo será de dominio público a información publicitada, e que quenes se encargaron da realización da festa proporcionaron unha información da que disporán tódolos veciños. Abondo máis da información que soemos ter de moitas dos cousas que nos afectan a nivel local. É ou non un avance?
Coido que nos tempos que corren si o é, a pesares de non ser a primeira vez (nin moito menos) que se pode dar algo semellante. Non me estou a referir a unha cousa concreta. Podería ser o balance das festas, como en Piñeira, pero tamén moitas outras informacións ás que o pobo debera ter acceso inmediato. Mesmo moitas veces para poder ter a oportunidade de participar na toma de decisións, ou para aportar ideas, ou sinxelamente para sentir máis o pulso do pobo, sentírmonos máis cidadáns. Por exemplo, poderían ser as actas dos plenos, non actualizadas na web do concello dende agosto, ou o calendario para este ano presente, tendo conta que xa houbo un primeiro intento e na web do concello aparece o calendario laboral ... para o 2008. A páxina web ribadeo.org marcou un incremento substancial da información que nos pode chegar ós veciños dun xeito directo. Información que tende a medrar, pero que ó mesmo tempo, necesita de revisión e un coidado constante, como rematamos de ver cos dous exemplos citados. E como poderiamos constatar polas cousas que faltan, tanto de información como de posibilidades de facer xestións.
Comezando o ano, 2010 é, na súa maioría, futuro. Cheo de posibilidades. Unha delas, por exemplo, aproveitando a ampliación do “plan E” ó presente ano, a de facilitar a difusión de información ós veciños ... e a posibilidade dos veciños para acceder á información e contribuír a xestionar o propio concello. Informacións xeradas polo propio concello. Xestións ante a administración que redundarían no ben de todos, indo na liña proxectada na UE, que pretende que se instale a administración electrónica a nivel estatal antes de 2015, e que en España, segundo plans ministeriais, tería que terse xa implementado (Lei 11/2007 'de Acceso Electrónico de los Ciudadanos a los Servicios Públicos'). Un futuro aproveitable e sempre mellorable ó que se ten referido moitas veces a AVV O Tesón.
E, o plan E, que ten que ver neste caso? Pois, por exemplo, aproveitando os obxectivos declarados polo mesmo plan, ampliar a infrastrutura tecnolóxica do concello (si, tamén da administración do concello, pero máis, en xeral de todo o concello para o aproveitamento das TIC) e facilitar o acceso a internet vía unha wifi municipal, que chegue ás parroquias que aínda non teñen a posibilidade de conexión. Sei que hai dificultades por enfrontamento con intereses empresariais nas telecomunicacións, pero hai exemplos de conexión en diversos pobos da xeografía nacional, e hai peticións para paliar unha falta no rural, cunha solución da que tamén poderia aproveitarse o casco urbano. Asemade, para unha mellora na web municipal (que cabe no plan E), facendo que sirva para máis, na vía da administración electrónica, e que sirva para mellorar as relacións administración-administrado como foi xa dito no parágrafo anterior, xa hai exemplos diversos a grande escala polo mundo adiante. Por certo que a administración-e ten sido motivo polo que xa ten participado xente de Ribadeo en proxectos transnacionais. Tamén o plan E pode servir para formación para poder aproveitar eses medios, aumentando as posibilidades da infrastrutura e persoal xa adicado no concello á sociedade da información (cun orzamento que non pasa polos mellores momentos). En fin, infrastruturas e melloras das que nos podemos beneficiar todos.
O dito, 2010 aínda é futuro.

20100105

Concerto da BMR

Antonte, domingo día 3, tivo lugar o concerto 'Aquí como en Viena' deste ano. Teño gravadas as tres últimas (están no dominio público), e son accesibles ó final, se ben as gravacións non están moi ben tomadas. Deixo asemade ligazóns a youtube no listado de cada unha das obras...
O concerto, en dúas partes, tivo como programa:
We are the world - Michael Jackson
O Rei León - Elton John / Hans Zimmer
Virginia - Jacob de Haan
Ammerland - Jacob de Haan
Danza Húngara nº 5 - Johannes Brahms
Valse Lírico - D. Shostakovich
Marcha Radetzky - Johann Strauss
Esta repitiuse, sendo dirixida a primeira vez por unha espectadora, Alicia Sarmiento.
Como é tradicional, o traxe dos músicos foi algo informal, e a presentación correu a cargo de Suso, que tamén tocou (e non sei se asinou algún autógrafo...)
As primieras obras foron acompañadas de proxección de vídeo ou presentación, sen luz no esceario, que foi suplida por linterniñas individuais de leds nos atrís.
Decididamente, prefiro os concertos da banda ás asambleas de amadores, por iso procurarei repetir unha idea á directiva: por que non un concerto despois da asamblea? Seguro que iría máis xente.
E un detalle que me lembrou a Hernán porque coido que foi unha iniciativa del que se segue a transmiter ano tras ano no calendario de agasallo de amadores: o 'GZ' despois de Ribadeo no enderezo de Amadores.
Valse Lírico

Danza Húngara nº 5

Marcha Radetzky, dirixida por Alicia Sarmiento

Marcha Radetzky, dirixida por David Ballester

Sobre Galicia? Parte dunha entrevista.

"- Esa diversidade pode ser un impedimento para a integración?
- Coido que non. Toda unidade fundada na unanimidade é unha falsa unidade que non ten destino. A única unidade digna de fe é a unidade que existe na diversidade e na contradición das súas partes. Hai unha triste herdanza do estalinismo e iso que chamaron socialismo real ao longo do século XX que traizoou a esperanza de millóns de persoas xustamente porque impuxo ese criterio, o de que a unidade é a unanimidade. Confundiuse así a política coa relixión. Aplicáronse criterios que eran habituais nos tempos da Santa Inquisición, cando toda diverxencia era unha herexía digna de castigo. Iso é unha negación da vida. É unha especie de cegueira que te impide moverte porque o motor da historia humana é a contradición.
(...) o problema é a tentación dunha palabra abominable: o liderado. Todos os países atribúense a intención de exercelo e isto xera relacións contaminadas pola orde xerárquica que nega a igualdade de dereitos. Eu non quero que ninguén sexa o meu líder. Non quero mandar nin ser mandado. Non nacín para obedecer. Nacín para exercer a miña liberdade de conciencia. Non podo aceptar a idea de que entre as persoas ou entre os países haxa condutores ou conducidos. Hai que ir cara a unha sociedade de veras libre."

Non, non é sobre Galicia, é referido a América Latina, tomado dunha entrevista ó autor de 'As veas abertas de América latina', Eduardo Galeano, que pode verse en 'Rebelión'. Pero, faría falta cambiar tanto para aplicalo a outros lugares?

20100104

Aprendendo de Piñeira

Un folio na porta dunha igrexa, un avance social? Porque iso foi o que vin esta mañá na igrexa de Piñeira. ¿? Se o folio se refire á dación de contas da última festa da parroquia, significa que o domingo será de dominio público a información publicitada, información da que disporán tódolos veciños. É ou non un avance? Coido que nos tempos que corren si o é, a pesares de non ser a primeira vez (nin moito menos) que se produce algo semellante. Non me estou a referir a unha cousa concreta. Podería ser o balance das festas, como en Piñeira, pero tamén moitas outras informacións ás que o pobo debera ter acceso inmediato. Por exemplo, as actas dos plenos, non actualizadas na web do concello dende agosto, ou o calendario para este ano presente, tendo conta que xa houbo un primeiro intento e na web do concello aparece o calendario laboral ... para o 2008.

Internet e Ribadeo

Dende hai tempo, a relación internet e Ribadeo é mellorable, o que xa ten dado orixe a varias entradas no blog. Como pode comprobar calquera, internet non é aínda para todos os ribadenses. Agora remata de saír un grupo en Facebook que o pon máis de manifesto e chama a acción. Seguramente sairá unha nota miña esta fin de semana na Comarca. Pouco a pouco, irase mellorando...

20100103

Capitalidade, custe ... e eficiencia

A raíz dunha nova nun xornal sobre o custe dos actos previstos para o semestre de presidencia española da UE, 90 M€, un dos orzamentos máis baratos de presidencia semestral, fixen unhas contas: a presidencia española da UE costará a Ribadeo (ós ribadenses, por proporcionalidade) uns 20 000 €, case tres millóns e medio das antiguas pesetas.
De calquera xeito, a pregunta non debera versar sobre o custe, senón sobre a eficiencia: serán ben invertidos?

20100102

Terremotos



Para comprobar e achegar máis información á da prensa (Voz de hoxe) entro na páxina do Instituto Xeográfico Nacional e atópome as dúas tomas de pantalla que achego. Unha, máis xeral, cos terremotos na península, e outra coa zona do terremoto de Triacastela.
a hora, as 10 menos curato da noite. O lugar, xusto no centro do triángulo Triacastela-Becerreá-Sarria, a magnitude, 2, baixiña. A ter en conta que é unha escala non lineal, pero que aproximadamente pode tomarse como logarítmica (parella á dos decibelios), de xeito que un terremoto de magnitude 3 ten perto de 30 veces máis potencia que outro de magnitude 2. Por outra banda, unha magnitude de 6 ML é equivalente a unha explosión de 30.000 t de TNT ou a unha explosión nuclear de 30 kilotóns, de xeito que o de onte correspondería á explosión de menos de 1 t de TNT

Unha pregunta

Como un local 'de apertura nouturna' pode estar aberto e con música dende a noite anterior ata ben pasado o mediodía, cando os outros levan horas cerrados? Será porque está cheo de máis? Será polos beneficios económicos do propietario? Será sinxelamente porque lle deixan? Será porque ninguén se queixa?

20100101

Para comezar o ano, un cálculo...

O que se pode seguir aquí. As preguntas? Pois por exemplo, cantos cartos se tiraron ó lixo ou ó peto dalgúns? Quen os tirou?

Un novo ano, 2010

... Cheo de desexos e vontade para cumprilos. Pode que cun chegue. Collo, de xeito case aleatorio, unha entrada de Kriptópolis e quédome cunhas das frases finais (aconsello ler toda a entrada, coido que paga a pena aínda que se refira a un tema concreto).
Para metelas no blog, descontextualízoas de xeito coidadoso para xeralizalas quedándome coa esencia: "Durante moitos anos, os (...)activistas loitamos para conseguir (...) os mesmos dereitos que (...). Para que as ideas circulasen (...) coa mesma liberdade coa que as personas pasean (...).
Nalgún momento do camiño equivocámonos. A medida que íamos conseguindo exercitar máis e máis dereitos (...), deixamos de exercelos (...).
Fai tempo que o poder deixou de ternos medo. Desprézanos. Nun contexto de brutal crise económica, o descontento non trascende ás rúas, e ante as próximas eleccións (...), o poder só pensa nas claves mediáticas do curto prazo."
Por se o anterior non chegara, unha entrevista a Leonardo Boff pode ser quen de que a xente se dispoña para actuar algo máis...