En Ribadeo polo antroido, sen antroido: Asilo, obras e funcionamento

Non se trata do asilo político, que daría tema para o antroido, senón do hospital asilo de Ribadeo.
Recollo un comentario na rede de Javier Chao:
Pareceme moi ben que se fagan todas estas melloras, pero como ben dice o alcalde son feitas a conta de TERCEIROS, dunha herencia niste caso. A quen llo temos que agradecer niste caso concreto é á persona que deixóu unha herencia dos 90.000€. Pero falando do hospital-asilo hai que destacar que é MUNICIPAL, e polo tanto a responsabilidade do seu correcto funcionamento é do Sr. Alcalde. Quero que quede constancia que o funcionamento deste servicio é lamentable, parece ser que o Sr. Alcalde aínda non se enterou a día de hoxe. Sería moito mais interesante que en vez de esta demostración de pura propaganda a conta de terceiros se preocupase de ver se atenden ben "las hermanitas" ós nosos maiores. Sabe que fan os residentes no tempo libre?. Pois dígollo eu (NADA DE NADA...) non hai nin un animador que os manteña activos (á ultima despedírona en agosto) e as mais das veces están solos na sala de estar tendo en moitas ocasións que atender a mais de un as visitas dos residentes. Quero así mismo que quede claro que se vai funcionando é gracias ás empregadas. Por último xa que aínda queda moito pra posta en marcha da futura residencia sería ben que foran pensando no bon funcionamento deste servicio que temos hoxe que nos dous últimos anos vai de mal en peor.
E engádolle a nova da web do concello:

O REXEDOR DI QUE TEN QUE ESTAR EN PERFECTAS CONDICIÓNS

Melloras no hospital asilo

16/02/2015

O Concello realiza diversas melloras no hospital asilo de Ribadeo, grazas á herdanza que unha veciña, falecida hai pouco tempo, deixou para este fin. En total o investimento realizado na modernización do ascensor, no cambio das ventás da terceira planta e na compra de electrodomésticos para a cociña e a lavandería ascendeu a uns 90.000 euros, segundo deu a coñecer este mediodía o alcalde, Fernando Suárez Barcia,

O rexedor sinalou que "quixemos desde o Concello recoñecer este acto de fraternidade que esta veciña de Ribadeo, que nos deixou non hai moito tempo, e que quixo que unha parte do seu legado, da súa herdanza, fose destinado ao hospital asilo de Ribadeo. E o Concello, coma lexítimo propietario dese edificio, ten a obriga de investir ese diñeiro da súa herdanza nas necesidades máis importantes, de acordo coa congregación relixiosa Marta e María, que rexe o hospital asilo".
Suárez Barcia explicou que "eses cartos destináronse en modernizar e adaptar á normativa o ascensor do inmoble, traballos nos que se investiron uns 14.500 euros; outros 28.000 euros foron para proceder ao cambios das ventás da planta terceira, dado que nas outras plantas xa se tiña actuado hai uns dous anos entre o Concello e a Deputación de Lugo. Todo isto supuxo unha notable mellora térmica con illamento magnífico que permite que os residentes se encontren nunhas mellores condicións". O alcalde ribadense dixo que "tamén fixemos unha nova instalación de auga quente sanitaria, para adaptala ás novas normativas e con depósitos actuais máis grandes e quixemos facer unha serie de cambios nos equipos electrodomésticos tanto na cociña (fritadeiras, lavalouzas, carros quentes) como na lavandería, adquirindo novas lavadoras e secadoras industriais. A inversión de todo isto, que foi por un procedemento aberto, superou os 90.000 euros, que é aproximadamente o legado que esta muller lle deixou ao hospital asilo. Si hai algún floco pendente será asumido polo Concello".
Fernando Suárez subliñou que "a querencia desta xente que ao final da súa vida quere que parte da súa fortuna vaia para unha dotación pública, en fraternidade das persoas, queremos facerlle este recoñecemento público. O seu legado está a ser moi ben investido no hospital asilo de Ribadeo. Sen perxuízo de que o Concello, como todo o mundo sabe, está a traballar nunha nova residencia en construción na actualidade, con moitas ilusións e expectativas depositadas nela. Pero temos que seguir traballando neste hospital asilo, que ten que estar en perfectas condicións porque ten que durar moitos anos máis".
E, para rematar, pregunto:
* que recoñecemento público se fai se non se nomea á persoa que cedeu os cartos? Ó mellor é que non quería que se soubera, e nese caso, está de máis a nota e o recoñecemento por vía dela.
* que seguimento de funcionamento se fai? Sería cousa de afinar os métodos antes de poñer a funcionar a nova residencia.
--
Recollido do xornal, da nova 'Invierten en el asilo de Ribadeo la herencia que dejó una octogenaria' de La Voz de Galicia: Manuela Alonso Amor.

Progresión do coronavirus en Ribadeo (III)

   Cando parecía que as cousas retornaban á súa canle, despois dunha semana da entrada anterior sobre o tema, veu a nova: dous mortos. E é que (ver o gráfico) tal parece que o brote está controlado, así o indica a liña de tendencia, coa ralentización da aparición de novos casos. Segue sen dicirse nada de xeito oficial sobre a orixe do brote ou o seu esparcemento. Deixo as dúas últimas notas de prensa do concello abaixo.

Datos coa liña de tendencia.

 

O RESTO DO ENFERMOS EVOLUCIONAN CON NORMALIDADE

Volta ao Hospital Asilo

09/01/2021

Volven ao Hospital Asilo, despois de superar o covid-19, catro dos usuarios que foran trasladados ao Cegadi en Santiago de Compostela, segundo deu a coñecer este sábado o alcalde, Fernando Suárez.  Estas persoas superaron a doenza, deron negativo nos controis de PCRs e teñen inmunidade xerada contra o coronavirus.

O rexedor dixo que "tal e como se veu indicando nestes últimos días, queremos sinalar con toda a precaución e prudencia necesarias que o tempo está a xogar a favor de ir recuperando a normalidade. Camiño das 3 semanas desde que se detectaron os primeiros casos de positivos en coronavirus a situación é a seguinte: entre antonte e hoxe 4 persoas que estaban desprazadas no Cegadi (Centro Galego de Desenvolvemento Integral) volven para o Hospital Asilo de San Sebastián e San Lázaro, unha vez que superaran a doenza e deran negativo nos controis de PCRs e que nos tests de anticorpos revelasen que teñen inmunidade xerada contra o covid19".

Suárez Barcia comentou que "o resto de persoas usuarias, tanto as que continúan no Cegadi como as que sempre permaneceron no Hospital Asilo, evolucionan con normalidade e manteñen, en termos xerais, uns niveis aceptables de sintomatoloxía, a pesares de que moitas delas teñen unha idade moi avanzada e presentaban xa patoloxías previas. En canto ao persoal e á relixiosa, tamén se atopan en proceso de recuperación".

O alcalde contou que "ademais, segundo nos manifestan responsables do Cegadi, outras persoas están superando tamén esta doenza aínda que seguirán alí uns días máis dado que a súa recuperación física xeral recoméndao. Así temos que: os  4 traballadores afectados están nos seus domicilios gardando a corentena necesaria e cos protocolos pertinentes. En canto aos usuarios, e ao longo deste gromo producido hai días,19 deles foron trasladados ao Cegadi. 4 deles superaron a doenza e xa foron trasladados a Ribadeo polo que o número actual que aínda segue alí é de 15 persoas. Outros 3 usuarios diagnosticados como positivos, e de acordo cos criterios das autoridades sanitarias, permanecen no Hospital Asilo debido ao seu elevado nivel de dependencia previo ao contaxio vírico. Tamén se atopa nesta situación, desde o primeiro día detectado, a relixiosa afectada de covid19. Para todas estas persoas están habilitados igualmente os protocolos de atención, coidado e protección indicados polos servizos sanitarios e sociais".

Fernando Suárez seguiu a relatar que "tamén se atopa 1 persoa usuaria no Hospital da Costa en Burela, indicándose que cando supere a situación hospitalaria será derivada segundo o seu grao de dependencia ben ao Cegadi ou  ben ao Hospital Asilo de Ribadeo". 

O rexedor insistiu en que "se segue valorando como moi positiva a actuación coordinada na aplicación dos Protocolos e Planes de Continxencia por parte da  dirección do centro e do seu persoal, así como a actitude dos residentes á hora de enfocar esta crise sanitaria. Igualmente se continúa a valorar moi positivamente a actuación coordinada das autoridades sanitarias do Hospital da Costa e das do Cegadi por ir desprazando a Santiago a estas persoas afectadas, logrando así dous obxectivos estratéxicos neste momento: o primeiro é que os afectados estean nas mellores condicións de atención residencial e hospitalaria posible. E o segundo é que o Hospital Asilo de Ribadeo vexa diminuído de xeito moi importante o risco de transmisión vírica para o resto de persoas que viñeron dando negativo en todo este tempo e que actualmente suman 22 entre usuarios y persoal, aos que agora hai que sumar as 4 persoas que retornan por estar curadas facendo un total de 26". 

E engadiu que "como sempre indicamos, manteremos informada á cidadanía sexa cal sexa a situación á que nos teñamos que enfrontar, coa confianza de que ter pasado xa polo pico de madurez deste gromo que se iniciou hai unhas tres semanas. Seguirémolo a facer a medida que vaiamos obtendo información, ben por nós mesmos ou ben proporcionada polas autoridades sanitarias autonómicas en canto nola vaian facilitando, sempre co mellor ánimo informativo e para dar a confianza necesaria que evite rumoroloxías ou situacións de confusión".

ESTE MÉRCORES FARASE UN NOVO CRIBADO XERAL NO CENTRO

Situación no Hospital Asilo

11/01/2021

Dous residentes do Hospital Asilo, que foron trasladados a Santiago hai días, faleceron nas últimas horas. Trátase de persoas de  avanzada idade (99 e 91 anos), que se atopan nun estado moi fráxil e con patoloxías previas ao coronavirus, segundo ven de informar o alcalde, Fernando Suárez. Tres usuarios mais retornan a Ribadeo despois de superar o covid e de ter xerado inmunidade contra este virus.

O rexedor sinalou que "segundo puidemos ir sabendo, temos dous tipos de noticias que fan que esta nota de prensa teña un carácter agridoce. Dúas das persoas que levaban xa días trasladadas ao Cegadi (Centro Galego de Desenvolvemento Integral) faleceron nestas últimas horas. En ambos os dous casos trátase de persoas de moi avanzada idade, unha de 99 e outra de 91 anos, que se atopaban nun estado moi fráxil e con patoloxías xa previas ao contaxio por Covid19. Como estaban nun estado de atención delicado, non se lles chegou a facer as PCR para saber se xa chegaran a superar a doenza do coronavirus, (tal e como se lles fixo a outras persoas que ingresaron ao mesmo tempo no Cegadi). Con todo, é de supoñer que nas estatísticas oficiais aparecerán como falecemento por coronavirus".

Fernando Suárez subliñou que "por outra banda, e segundo nos indican os responsables do Cegadi, nas vindeiras horas serán trasladadas ao Hospital Asilo de San Sebastián e San Lázaro 3 persoas máis, unha vez que superaran a doenza e deran negativo nos controis de PCRs e que nos tests de anticorpos revelasen que teñen inmunidade xerada contra o Covid19. Igualmente soubemos que, segundo as autoridades sanitarias do Hospital da Costa, prevese que este mércores se faga un novo cribado xeral no Hospital Asilo para comprobar de novo a progresión ou estabilización deste gromo".

O alcalde dixo que "o resto de persoas usuarias, tanto as que continúan no Cegadi como as que sempre permaneceron no Hospital Asilo, evolucionan con normalidade e manteñen, en termos xerais, uns niveis aceptables de sintomatoloxía, a pesares de que moitas delas teñen unha idade moi avanzada e presentaban xa patoloxías previas.En canto ao persoal e á relixiosa, tamén se atopan en proceso de recuperación. Así temos que: os 4 traballadores afectados están nos seus domicilios gardando a corentena necesaria e cos protocolos pertinentes; en canto aos usuarios, e ao longo deste gromo producido hai días, dos 19 que foron trasladados ao Cegadi, 7 deles superaron a doenza e xa foron ou van ser trasladados a Ribadeo polo que o número de persoas que alí seguirá vese reducido a 10; outros 3 usuarios diagnosticados como positivos, e de acordo cos criterios das autoridades sanitarias, permanecen no Hospital Asilo debido ao seu elevado nivel de dependencia previo ao contaxio vírico. Tamén se atopa nesta situación, desde o primeiro día detectado, a relixiosa afectada de covid19. Para todas estas persoas están habilitados igualmente os protocolos de atención, coidado e protección indicados polos servizos sanitarios e sociais. A día de hoxe tamén se atopa 1 persoa usuaria no Hospital da Costa en Burela, indicándose que cando supere a situación hospitalaria será derivada segundo o seu grao de dependencia ben ao Cegadi ou  ben ao Hospital Asilo de Ribadeo".

Suárez Barcia engadiu que "se segue valorando como moi positiva a actuación coordinada na aplicación dos Protocolos e Plans de Continxencia por parte da  dirección do centro e do seu persoal, así como a actitude dos residentes á hora de enfocar esta crise sanitaria. Igualmente se continúa a valorar moi positivamente a actuación coordinada das autoridades sanitarias do Hospital da Costa e das do Cegadi por ir desprazando a Santiago a estas persoas afectadas, logrando así dous obxectivos estratéxicos neste momento: o primeiro é que os afectados estean nas mellores condicións de atención residencial e hospitalaria posible. E o segundo é que o Hospital Asilo de Ribadeo vexa diminuído de xeito moi importante o risco de transmisión vírica para o resto de persoas que viñeron dando negativo en todo este tempo e que actualmente sumando os que sempre deron negativo e os que viñeron do Cegadi coa doenza superada ascenden 29 persoas entre usuarios e persoal. Como sempre indicamos, manteremos informada á cidadanía sexa cal sexa a situación á que nos teñamos que enfrontar, coa confianza de que ter pasado xa polo pico de madurez deste gromo que se iniciou hai máis de tres semanas. Seguirémolo a facer a medida que vaiamos obtendo información, ben por nós mesmos ou ben proporcionada polas autoridades sanitarias autonómicas en canto nola vaian facilitando, sempre co mellor ánimo informativo e para dar a confianza necesaria que evite rumoroloxías ou situacións de confusión".

--

 Anteriores sobre Coronavirus e Ribadeo:

Covid 19 no Hospital-Asilo de Ribadeo (1) . Evaristo Lombardero 

Progresión do coronavirus en Ribadeo (II) 

Nota de prensa con ledicia: vacina 

Progresión do coronavirus en Ribadeo

Progresión do coronavirus en Ribadeo

   Nunha semana, o alcalde leva difundido tres notas de prensa sobre o coronavirus en Ribadeo. En concreto, sobre o brote que afecta ó hospital asilo (non á nova residencia de maiores). Aínda que sobre a orixe circula un rumor insistente, non está recollido nelas, polo que queda como iso, como rumor.

Coa liña de tendencia engadida.

   Á espera de máis novas (é de supoñer que mañá día 30 apareza outra), deixo as novas que recollo na web do concello por orde cronolóxica, tal cal. É dicir, recollendo única e exclusivamente a versión do concello (mesmo sen corrixir posibles erratas):

1.-

POLO MEMENTO QUEDAN SUSPENDIDAS AS VISITAS AO CENTRO

Hospital Asilo de Ribadeo

23/12/2020

Tres residentes do Hospital Asilo de San Sebastián e San Lázaro, de Ribadeo, deron positivo por covid-19, segundo informou esta mañá o alcalde, Fernando Suárez. A detección produciuse dentro dos cribados periódicos que o Sergas realiza nas distintas residencias e centros de maiores. Estas tres persoas atópanse con sintomatoloxía leve e foron trasladadas a unha residencia médica que a Consellería de Sanidade ten habilitada para estes casos en Santiago de Compostela.

O rexedor contou que "tivemos no día de hoxe coñecemento verbal por parte dos responsables do Hospital da Costa de Burela, que dentro dos cribados periódicos que o Servizo Galego de Saúde está facer nas distintas residencias e centros de maiores, producíronse tres positivos de persoas residentes no Hospital Asilo de San Sebastián e San Lázaro de Ribadeo".

Suárez Barcia dixo que "estas tres persoas, segundo nos indican os responsables da Consellaría de Sanidade, atópanse cunha sintomatoloxía leve e xa foron trasladadas a unha residencia médica que a Consellería de Sanidade ten habilitada para estes casos en Santiago de Compostela. Por outra banda, infórmasenos de que a totalidade de traballadoras e traballadores do centro están sendo chamados para facer unha nova proba de diagnóstico para estar completamente seguros da situación á que nos temos que enfrontar".

O alcalde subliñou que "entrementres, por parte da dirección do Hospital Asilo xa se activaron de xeito inmediato os plans de continxencia e protocolos previamente establecidos para este tipo de situacións coa fin de controlar esta situación para que non vaia a máis. O funcionamento desta residencia en toda a xestión desta pandemia estivo sendo impecable tanto pola dirección como pola do persoal traballador, usuarios e familiares destes. Sempre se cumpriron todos os estándares fixados polas autoridades Sanitarias competentes, así como tamén neste Centro se foron implementando desde o inicio da crise sanitaria todas as melloras posibles de limpeza e desinfección". 

Fernando Suárez engadiu que "tamén se foi, e se é moi estrito, cos contactos dos residentes cos familiares ou achegados e todos estes posibles contactos nas visitas se fan cumprindo os mais estritos protocolos. E igualmente, o persoal traballador estivo cumprindo cos protocolos establecidos para a correcta actuación. Con todo, e a partires deste mesmo momento, e en tanto a situación non sexa normalizada, suspéndense as visitas aos usuarios e  usuarias do Hospital Asilo por parte de familiares".

Para o alcalde ribadense "débese ser consciente de que nesta situación de crise sanitaria por mor do Covid19 non existe risco cero, aínda que o centro está preparado para afrontar esta situación, tanto a nivel de persoal como de medios".

O rexedor engadiu que "ofrecemos toda a transparencia coa información que poidamos saber por nós mesmos ou pola información que as autoridades sanitarias autonómicas nos vaian dando nas vindeiras horas, ao tempo que queremos pedir cautela en comentarios ou rumoroloxía, a fin de evitar situacións de confusión ou malos entendidos. Todo parece indicar que a esta emerxencia sanitaria que dura mais de nove meses, estase traballando arreo con todos os medios e por todas as administracións e nos vindeiros días, previsiblemente na semana que vén,  as vacinas chegarán, empezando precisamente por estes centros residenciais como é o caso do Hospital Asilo de San Sebastián e San Lázaro de Ribadeo".

2.-

ESTA MAÑÁ FOI REALIZADO UN NOVO CRIBADO NO CENTRO

Novos positivos no hospital asilo

26/12/2020

Rexistrados tres novos positivos por covid19 no Hospital Asilo de Ribadeo. Trátase de dúas usuarias e unha relixiosa. Todas presentan sintomatoloxía leve, segundo o alcalde, Fernando Suárez.

O rexedor explicou que "tivemos coñecemento de que ás tres persoas que deron positivas como contaxiadas de Covid19 temos que engadir tres persoas máis nestas últimas horas. Neste caso, dúas usuarias e unha relixiosa. Unha delas foi traslada onte á residencia médica que a Consellaría de Sanidade ten habilitada para estes casos en Santiago de Compostela. Outra presentou síntomas hoxe á mañá e foi trasladada ao Hospital da Costa para analizar o seu estado. En canto á relixiosa, está mantendo o confinamento total preceptivo para estes casos". 

Suárez Barcia dixo: "cabe destacar que a totalidade das seis persoas positivas, as tres do primeiro día e estas tres últimas, atópanse polo momento con sintomatoloxías leves".

O alcalde contou que "segundo nos manifestan os responsables do Hospital da Costa de Burela, na mañá de hoxe procedeuse a facer un novo cribado xeral para determinar se pode haber algún contaxio máis ou se pola contra a situación permanece estable. Agardan ter os resultados en breve".

Fernando Suárez indicou que "desde o Hospital-Asilo de San Sebastián e San Lázaro, mantéñense os protocolos e plans de continxencia establecidos para estas situacións e con limpezas e precaucións reforzadas para tentar controlar a situación. Reitérase que nesta crise sanitaria por mor da pandemia que estamos a vivir non existe risco cero, aínda que o centro está preparado para afrontar esta situación, tanto a nivel de persoal como de medios".

O rexedor ribadense engadiu que "manteremos informada á cidadanía a medida que vaiamos tendo información, ben sabida por nós mesmos ou ben proporcionada polas autoridades sanitarias autonómicas en canto nola vaian facilitando, sempre co mellor ánimo informativo e para dar a confianza necesaria que evite rumoroloxías e situacións de confusión ou malentendidos".

3.-

OS USUARIOS PRESENTAN SINTOMATOLOXÍA LEVE

Situación no Hospital Asilo

28/12/2020

Confirmados 8 novos positivos por covid19 no Hospital Asilo de Ribadeo, segundo deu a coñecer esta mañá o alcalde, Fernando Suárez. En total son 14 as persoas afectadas polo gromo detectado a pasada semana, 13 usuarios que foron trasladados á residencia do Cegadi en Santiago e unha relixiosa que segue en estrito confinamento en Ribadeo.

O rexedor contou que "este sábado pasado, despois de detectarse novos casos de positivos en Covid19, as autoridades sanitarias fixeron un novo cribado xeral. Os resultados recibidos indican que hai 8 novos casos de positivos confirmados. Trátase de persoas residentes. En canto aos do persoal traballador, todos eles deron negativo. Polo tanto, e aplicando o criterio dos días anteriores, a totalidade dos residentes diagnosticados como positivos xa foron trasladados á Residencia do Cegadi (Centro Galego de Desenvolvemento Integral) que a Xunta de Galicia ten habilitada para estes casos en Santiago de Compostela, onde tamén se encontran as persoas que xa deron positivo nos días anteriores, facendo un total de 13 persoas alí desprazadas. A esta cifra débeselle sumar a da relixiosa que se mantén en estrito confinamento".

Suárez Barcia dixo: "segundo nos confirman nas últimas horas os responsables do Cegadi, todas as persoas manteñen uns niveis leves de sintomatoloxía. Esta residencia habilitada posúe as características de residencia de maiores co engadido de que dispón de funcionalidades hospitalarias, que o resto de residencias non teñen. Estas mesmas autoridades, tanto as sanitarias do Hospital da Costa como as de Política Social do Cegadi, indican que esta situación actual deriva dunha previa que vai desencadeando un gromo, por canto unha grande parte dos afectados son compañeiros de cuarto de persoas previamente contaxiadas".

O alcalde seguiu a relatar que "tamén nos indican os responsables sanitarios do Hospital da Costa que de cara a mediados de semana farase un novo cribado xeral para comprobar se o gromo se estabiliza ou se pola contra hai novos contaxiados, sen prexuízo de que se poidan realizar novos test de antíxenos de xeito inmediato se algún outro residente mostra síntomas de contaxio antes dese cribado".

Fernando Suárez fixo unha valoración positiva das medidas adoptadas: "valórase polo tanto como moi positiva a actuación coordinada na aplicación dos Protocolos e Planes de Continxencia por parte da  dirección do centro e do seu persoal, así como a actitude dos residentes á hora de enfocar esta crise sanitaria. Igualmente se valora moi positivamente a actuación coordinada das autoridades sanitarias do Hospital da Costa e das do Centro Galego de Desenvolvemento Integral por ir desprazando a Santiago a estas persoas afectadas, logrando así dous obxectivos estratéxicos neste momento: o primeiro é que os afectados estean nas mellores condicións de atención residencial e hospitalaria posible. E o segundo é que o Hospital Asilo de Ribadeo vexa diminuído de xeito moi importante o risco de transmisión vírica para o resto de usuarios, que viñeron dando negativo en todo este tempo e que actualmente suman 24 persoas".

O rexedor engadiu: "como sempre indicamos, manteremos informada á cidadanía sexa cal sexa a situación á que nos teñamos que enfrontar, coa confianza de que en poucos días estaremos no pico de madurez deste gromo que se iniciou a principios da semana pasada. Farémolo a medida que vaiamos obtendo información, ben por nós mesmos ou ben proporcionada polas autoridades sanitarias autonómicas en canto nola vaian facilitando, sempre co mellor ánimo informativo e para dar a confianza necesaria que evite rumoroloxías ou situacións de confusión".

Covid 19 no Hospital-Asilo de Ribadeo (1) . Evaristo Lombardero

 

Hospital asilo de San Sebastián e San Lázaro de Ribadeo

Covid 19 no Hospital-Asilo de Ribadeo (1)  

        A primeira noticia en medios oficiais sobre o brote de covid-19 no Hospital Asilo de Ribadeo coñeceuse o día 23 de decembro de 2020. Nesa data a paxina web do concello decía o seguinte: 

“Tres residentes do Hospital Asilo de San Sebastián e San Lázaro, de Ribadeo, deron positivo por covid-19, segundo informou esta mañá o alcalde, Fernando Suárez. A detección produciuse dentro dos cribados periódicos que o Sergas realiza nas distintas residencias e centros de maiores…” 

       Nos días seguintes saíron novas notas na mesma páxina web onde se daba conta da progresión do brote que xa chegou a 24 ou 25 persoas incluíndo usuarios e varios empregados do centro devandito. 

       Como podemos observar nas notas da páxina web do concello  “… a detección produciuse dentro dos cribados periódicos que o Sergas realiza…”. O cal quer dicer que según estas notas oficiais non se detectou nengún caso anterior que puidese ter relación con este brote xa que os casos do Asilo foron detectados a traveso dos “cribados periódicos”. 

       No intre de escribir esta nota (4 de xaneiro) xa está corrida por todo Ribadeo outra versión dos feitos segundo a cal unha persoa que cumpria unha laboura de tipo espiritual no Hospital Asilo resultou positiva arredor do dia 21 ou 22 de decembro. De ahí despréndese que as probabilidades de que este primeiro caso tivese algunha relación cos seguintes son bastante evidentes.  

        Debemos suliñar que non pretendemos personalizar nen moito menos culpabilizar a nengún dos actores de este proceso, senón crarexar os posibeis pontos oscuros para poñerlles solución e que non se repitan no sucesivo. Asemade estes días tivemos contactos teléfonicos ou personais co Servizo de M. Preventiva do Hospital da Costa, ca Delegación Provincial da Consellería de Saúde en Lugo, con persoal sanitario que exerce no Centro de Saúde de Ribadeo e con persoas moi próximas a todo este proceso por motivos familiares, profesionais, de vecindade etc. 

       Despois de esta introducción podemos afirmar que hai abondas evidencias e coincidencias para supoñer que os feitos aconteceron dun xeito bastante diferente a como os conta a páxina web do concello de Ribadeo, porque houbo un caso anterior de outa movilidade e risco e non autorizado para entrar no hospital segundo a normativa vixente. E da aquí xurden unha serie de preguntas: 

      ¿Descoñece o concello a versión extraoficial e que non ten nada que ver ca rumoroloxía ? ¿Non ten nengunha pista, mesmo entre o persoal do Hospital-Asilo e a congregación de Marta e María? ¿Non se fixo o rastrexo dos contactos do caso inicial supostamente descoñecido? 

       Calquera pode seguir ca cadea de inquéritos ate agora inexplicados pola versión oficial pero imos ver outra serie de dúbidas: 

       O ”Protocolo conxunto da Consellería de Sanidade e da Consellería de Política Social para o manexo da crise do COVID-19 nas Residencias de Maiores” (17,11,2020) establece as normas de tipo preventivo e para o control da infección mesmo entre usuarios, persoal, familiares, profisionais sanitarios, perruquería etc. Enténdese que aquelas actividades que non están autorizadas deben considerarse desautorizadas, como poderían ser as clases de piano ou os xogos florais, tendo en conta o outo risco de infección e a especial vulnerabilidade dos usuarios deste tipo de centros. Dito doutro xeito, está perfectamente regulado quen pode entrar e quen non nas residencias da terceira edade. E aquí ven outra serie de inquéritos: 

        ¿Sabía o concello de Ribadeo que persoas que non están incluidas no listaxe de autorizadas entraban e saían no Hospital-Asilo? ¿Sabía con qué periodicidade se daban estas visitas e cales eran as actividades e que riscos de infección poderían traguer? ¿Non é moita causalidade que o primeiro caso de infección neste brote esteña borrado da páxina web do concello cando é do dominio publico?         

       Non nos nos imos extender, cada un debe pensar pola sua conta. A nosa idea é que esta experiencia debera servir para avanzar na participación da veciñanza nas medidas de control de riscos diante da pandemia do Covid-19 e  nos servizos sociais de Ribadeo. Sería custión de crear unha asociación de usuarios, familiares e  persoas voluntarias que defenda uns servizos públicos e participados democráticamente, como xa existen en outras zonas de Galicia. A participación implica requerir información, analizar as diferentes actividades dos responsables políticos e de xestión,  propoñer solucións e alternativas aos distintos problemas e a fin de contas non tragar con rodas de muíño. 

   En Ribadeo existen duas residencias da terceira edade: o antigo Hospital-Asilo de San Sebastián e San Lázaro, de titularidade municipal, xestionado pola Congregación relixiosa de Marta e María, que conta con 47 prazas das cales están ocupadas actualmente unhas 38. Asemade existe outro centro residencial da terceira edade inaugurado en xunio de 2019 e xestionado polo Concello e a Deputación de Lugo anque  unha gran parte das actividades foron contratadas a CLECE, empresa de Florentino Pérez que o 31 de decembro de 2020 cedeu ou subcontratou a unha empresa asturiana, se ben de esta operación non hai información oficial ata o día de hoxe. Neste escrito referímonos á primeira, o Hospital Asilo de San Sebastían e San Lázaro. Da segunda non hai noticias de infectados a dia de hoxe.

Evaristo Lombardero Rico, 4 de Xaneiro de 2021

Acceso á 2ª parte.

Progresión do coronavirus en Ribadeo (II)

   Despois de ter esperado varios días dende o artigo 'Progresión do coronavirus en Ribadeo', por fin aparece na web do concello unha nova nota de prensa que copio abaixo.

A data de 30/12 como data de cribado é indicativa, ó non terse difundido información sobre o tema máis que as notas do concello, coas deficiencias á vista.

 

 

 

   Segue sen falarse da orixe do brote ou de como, seguindo os protocolos, xurdiu a expansión. Asemade, tamén se deixa sen cubrir a expansión fóra do asilo: a día de hoxe non se fixo cribado nin seguemento, que se saiba. E na páxina do SERGAS leva varios días a indicación de que Ribadeo ten 28 casos.

Nota do concello:

A VINDEIRA SEMANA REALIZARASE OUTRO MAIS

Cribado no Hospital Asilo

02/01/2021

O último cribado realizado no Hospital Asilo de Ribadeo deixa 10 novos positivos por covid, 7 de usuarios e 3 de traballadores do centro, segundo ven de confirmar o alcalde, Fernando Suárez.

O rexedor relatou que "este pasado xoves as autoridades sanitarias do Hospital da Costa fixeron un novo cribado xeral para comprobar a progresión do gromo detectado hai uns días no Hospital Asilo. Os resultados das probas indican que hai 7 novos casos de usuarios e 3 casos de traballadores do centro residencial".

Fernando Suárez dixo que "tal e como foi pasando nas situacións similares anteriores, iniciáronse de inmediato as actuacións coordinadas entre as autoridades Sanitarias, as autoridades de Política Social e máis as do Hospital Asilo. Así os traballadores afectados están nos seus domicilios gardando a corentena necesaria e cos protocolos pertinentes. En canto aos usuarios, 5 deles xa foron trasladados ao Cegadi (Centro Galego de Desenvolvemento Integral), que é unha Residencia con funcionalidades hospitalarias que a Xunta de Galicia ten habilitada para estes casos en Santiago de Compostela. Este Centro está preparado para a atención de persoas consideradas válidas ou con nivel de dependencia baixa. Agora neste momento xa se atopaban alí as persoas usuarias do Hospital Asilo que deran positivo nos días anteriores, facendo así un total de 18 persoas de Ribadeo nese Centro".

O alcalde sinalou que "outros 3 usuarios diagnosticados como positivos, e de acordo cos criterios das autoridades sanitarias, permanecen no Hospital Asilo debido ao seu elevado nivel de dependencia previo ao contaxio vírico. Tamén se atopa nesta situación, desde o primeiro día detectado, a relixiosa afectada de Covid19. Para todas estas persoas están habilitados igualmente os protocolos de atención, coidado e protección indicados polos Servizos Sanitarios e Sociais. No momento de ser emitida esta nota de prensa, tamén se atopa 1 persoa usuaria no Hospital da Costa en Burela, indicándose que cando supere a situación hospitalaria será derivada segundo o seu grao de dependencia ben ao Cegadi ou  ben ao Hospital Asilo de Ribadeo".

Suárez Barcia manifestou que "segundo nos indican os responsables sanitarios do Hospital da Costa, de cara a principios de semana farase un novo cribado xeral para comprobar se o gromo se estabiliza ou se pola contra hai novos contaxiados, sen prexuízo de que se poidan realizar novos test de antíxenos de xeito inmediato se algún outro residente mostra síntomas de contaxio antes dese cribado. Tamén nos informan nas últimas horas os responsables sanitarios e sociais que as persoas afectadas polo coronavirus manteñen, en termos xerais, uns niveis leves ou aceptables de sintomatoloxía. Estas mesmas autoridades, tanto as Sanitarias do Hospital da Costa como as de Política Social do Cegadi, indican que esta situación actual deriva dunha previa que vai desencadeando un gromo, por canto unha boa parte dos afectados son compañeiros de cuarto de persoas previamente contaxiadas".

O rexedor ribadense engadiu: "séguese valorando como moi positiva a actuación coordinada na aplicación dos Protocolos e Planes de Continxencia por parte da  Dirección do Centro e do seu persoal, así como a actitude dos residentes á hora de enfocar esta crise sanitaria. Igualmente se continúa a valorar moi positivamente a actuación coordinada das autoridades sanitarias do Hospital da Costa e das do Cegadi por ir desprazando a Santiago a estas persoas afectadas, logrando así dous obxectivos estratéxicos neste momento: o primeiro é que os afectados estean nas mellores condicións de atención residencial e hospitalaria posible. E o segundo é que o Hospital Asilo de Ribadeo vexa diminuído de xeito moi importante o risco de transmisión vírica para o resto de usuarios, que viñeron dando negativo en todo este tempo e que actualmente suman 16 persoas".

çFernando Suárez indicou que "como sempre indicamos, manteremos informada á cidadanía sexa cal sexa a situación á que nos teñamos que enfrontar, coa confianza de que en moi poucos días estaremos no pico de madurez deste gromo que se iniciou a principios da semana pasada. Farémolo a medida que vaiamos obtendo información, ben por nós mesmos ou ben proporcionada polas autoridades sanitarias autonómicas en canto nola vaian facilitando, sempre co mellor ánimo informativo e para dar a confianza necesaria que evite rumoroloxías ou situacións de confusión".

Plenos (II)

   Como complemento á entrada anterior (plenos), apunto a continuación a única información que hai dispoñible sobre a herdanza de Moreda e o seu recorrido no concello, a que provén do propio concello mediante unha nota informativa, e a que ven do PP, a través de diversas canles. Comezo por esta última.

Nota de prensa PP:

Así o manifesta o voceiro popular tras obter información sobre a herdanza do doutor Moreda na comisión informativa previa ao pleno solicitado polo seu Grupo Municipal

Daniel Vega: “Tras unha iniciativa do noso Grupo Municipal comézase a falar dun tema que o BNG quería ocultar”

• “O noso Grupo Municipal é a voz que reivindica transparencia” porque “tódolos ribadenses temos dereito a saber desta herdanza, un tema fundamental para Ribadeo”, dixo Vega

• “Os técnicos informaron de que faltan moitos pasos por dar” e, polo tanto, “continuaremos a defender a creación dunha comisión de seguimento integrada polos técnicos municipais, representantes dos grupos da corporación, da familia e das distintas administracións ás que se lle pida financiamento”, afirma

• O voceiro popular engade que “esta comisión debe ser tamén a encargada de organizar un acto de recoñecemento público a este filántropo por todo o que fixo por Ribadeo”

• Vega reitera: “estou empeñado en buscar financiamento para conseguir completar o orzamento para levar a cabo as obras de mellora do noso asilo”

Ribadeo, a 11 de maio de 2021.- O voceiro do Grupo Municipal Popular de Ribadeo, Daniel Vega, explica que “se comeza a falar e poñer luz sobre un tema que o BNG quería ocultar”, en relación á herdanza que o doutor Moreda lle deixou ao Concello coa finalidade de mellorar o hospital asilo de Ribadeo. Trátase “dun tema fundamental para Ribadeo” e “o noso Grupo Municipal é a voz que reivindica transparencia” porque “tódolos ribadenses temos dereito a saber deste tema”.

Así o manifesta tras participar na comisión informativa previa ao pleno extraordinario solicitado polo Grupo Municipal Popular na que os técnicos municipais e o persoal implicado no estudo da herdanza explicaron todos os pasos dados ata o de agora e adiantaron que “faltan moito pasos importantes por dar” porque queda a celebración dun xuízo e a subasta do piso de Ribadeo.

Vega avanza que “no pleno extraordinario do vindeiro xoves seguiremos defendendo a constitución dunha comisión de seguimento para coñecer os pasos a seguir en relación á herdanza e aos proxectos para a mellora do asilo. E esta comisión ten que darlle cabida aos técnicos municipais que traballaron ata o de agora e seguen traballando sobre este asunto, aos distintos grupos da corporación municipal, aos representantes da familia e das distintas administracións”. A este respecto, subliña que “é responsable darlle cabida ás administracións ás que se lles pide aportación económica”. E, nesa liña, reitera que “estou empeñado en buscar financiamento para conseguir completar o orzamento preciso para levar a cabo as obras de mellora do noso asilo”.

Recoñecemento ao filántropo

Así mesmo, o voceiro popular engade que “esta comisión debe ser tamén a encargada de organizar un acto de recoñecemento público a este filántropo por todo o que fixo por Ribadeo e, concretamente, por mellorar a calidade de vida dos usuarios do hospital asilo”.

Gabinete de Comunicación

Nota do concello:

 

O CONCELLO PEDIRÁ APOIO A OUTRAS ADMINISTRACIÓNS

Herdanza de Francisco Moreda

06/05/2021

No Concello de Ribadeo celebrarase unha comisión informativa da área social o vindeiro luns, 10 de maio, para dar conta aos grupos políticos da Corporación da herdanza aceptada de Francisco Moreda Pérez, co fin de destinala ao Hospital Asilo de San Sebastián e San Lázaro. O alcalde, Fernando Suárez, subliñou que "ese foi o desexo desa persoa e o equipo de goberno está empeñado en darlle un cambio positivo ao Hospital Asilo ao que se vai destinar toda esta herdanza".

Suárez Barcia dixo que "a proposta da Alcaldía convocamos para este luns unha comisión informativa da área social para que desde o goberno, acompañado tamén polos técnicos municipais, deamos conta aos representantes dos grupos políticos da Corporación do contido da herdanza aceptada do señor Francisco Moreda Pérez coa fin de destinala ao Hospital Asilo municipal de San Sebastián e San Lázaro, tal e como foi o desexo desta persoa. Será agora, neste momento e non outro, unha vez que puidemos determinar a magnitude da herdanza tanto de bens inmobles como doutros recursos económicos". 

O rexedor dixo que "máis aló desas intencións escuras de botar luz que pretende algún enredante popular, desde o goberno municipal preferimos actuar sempre de maneira clara e transparente coa responsabilidade que supón xestionar con determinación os recursos que alguén legou, cunha fin concreta, e polo que nos puxo nunha responsabilidade moi grande, e á que non queremos fallar máis aló do ruído mediático e interesado que por unha parte da oposición se poida facer".

O alcalde de Ribadeo engadiu que "estamos empeñados en darlle un cambio positivo ao Hospital Asilo, así o merece, e neste empeño utilizaremos toda esta herdanza, e o que non chegue dela, que pola magnitude das obras así será, pedirémoslle como sempre apoio a outras institucións. A ver se desta volta algunhas delas cumpren de verdade".

Francisco Moreda Pérez

   Esta tempada Francisco Moreda está de moda. De moda matemática, pola cantidade de veces que é citado. Sen ir máis lonxe, aquí no blo a última entrada que o cita é de 11 de maio, e hoxe volvo á carga copiando a nota do concello pola que se comunica que 'sufrirá' unha homenaxe, despois de tr cedido a herdanza o ano pasado:

 

ESTANSE A ULTIMAR OS DETALLES DA AMBICIOSA REFORMA

Recoñecemento público

11/05/2021

O alcalde, Fernando Suárez, anunciou que o Concello faralle un recoñecemento público a Francisco Moreda Pérez, quen quixo que os aforros e bens conseguidos na súa vida servisen para mellorar e facer un entorno máis agradable na vida doutros moitos veciños e veciñas, que un día foron del, a través da mellora do Hospital Asilo. O investimento a realizar nas obras de mellora nesas instalacións ascenderán a 1,5 millóns de euros.

O rexedor ribadense contou que "na comisión informativa, celebrada onte, para dar contido da herdanza aceptada do señor Francisco Moreda Pérez, coa fin de destinala ao Hospital Asilo Municipal, estivemos xunto cos corporativos, tamén os técnicos municipais actuais, os que anteriormente desempeñaron os cargos de interventor e tesoureiro nos meses anteriores, así como o avogado que estivo ao tanto das tramitacións da aceptación e da adxudicación da herdanza. Demos conta, polo miúdo, de todos os pasos dados para identificar os bens que esta persoa dispoñía, pois no testamento deixou dito que todos os seus bens foran para o Hospital Asilo, polo que o Concello de Ribadeo como titular do Hospital Asilo é quen debe velar para cumprir este seu desexo". 

Bens mobles e inmobles
Suárez Barcia explicou que "en canto aos bens inmobles legou o cen por cen dun céntrico piso na rúa Reinante, en Ribadeo, así como o cincuenta por cento indiviso do fallado deste edificio. Desde o Concello encargamos tres taxacións diferentes. Unha á Deputación Provincial, outra aos propios técnicos do Concello e unha terceira externa. A partir de hoxe, todos os interesados poderán ver os detalles na páxina web do Concello, concretamente no perfil do contratante ou tamén na plataforma de contratos do estado. Para isto poderán presentar ofertas en sobre pechado que será dun mes, a partir de mañá. O prezo de saída son 210 000 euros para o continente e 30 600 euros para o contido. Tamén esta persoa tiña como bens mobles un vehículo Ford EcoSport que foi entregado, xa o pasado 7 de novembro, á congregación relixiosa que xestiona o Hospital Asilo".

Diñeiro e produtos financieiros
O alcalde seguiu a relatar que "no tocante ao diñeiro e aos produtos financeiros que tiña, como accións, fondos de inversión, plans de pensións, etc…, actualmente a cifra non está pechada a día de hoxe porque mantemos unha discrepancia coa entidade financeira onde estaban estes instrumentos financeiros, que ven motivada na diferenza de valor de varios destes produtos entre o momento en que o Concello aceptou a herdanza, que foi en xullo de 2019, e o momento en que o banco efectivamente os puxo a disposición do Concello, que foi entre xuño e xullo de 2020. Desde o Concello de Ribadeo e confiando, unha vez máis, nos servizos xurídicos e económicos desta entidade, presentamos un preito xudicial contra o banco por esa diferenza e esta situación vaise dirimir nos próximos días no tocante a saber quen debe asumir esta posible depreciación dalgúns dos seus valores".

Fernando Suárez indicou que "con todo, debemos dicir que, unha vez que o Concello tivo acceso efectivo ás contas e aos fondos, atendendo tamén ás indicacións, como sempre, da intervención municipal, decidiu liquidar todos os produtos financeiros de xeito inmediato, dado que as administracións públicas non podemos ter ao noso cargo produtos de renda variable que estean suxeitos ás flutuacións do mercado senón que só podemos traballar con investimentos en condicións de liquidez e de seguridade. Pois, unha vez liquidado os produtos correspondentes a estas accións, fondos de inversión e plans de pensións, a cifra efectiva foi de 591 195 euros, e este é o importe que hai seguro e o que se coñece a día de hoxe á espera do que ocorra no xulgado". 

Custes asumidos que deben ir contra a herdanza
O rexedor manifestou que "tamén debemos dicir que, segundo os técnicos municipais, todos os gastos que a aceptación dunha herdanza xeren deberán ir a beneficio de inventario, isto é deberán detraerse da cantidade final efectiva. Neste caso, os diversos custos que obran tamén no expediente, como o pagamento de rendas pendentes desta persoa no apartamento no que vivía en Cataluña, o transporte dos enseres que alí tiña para Ribadeo, os honorarios dos avogados, a notaría, o rexistro, as taxacións dos inmobles, etc…, ascenden a unha cantidade de 22 972 euros".

Destino da herdanza: arranxo e adaptación do edificio do Hospital Asilo
Fernando Suárez sinalou: "en canto ao destino da herdanza, dado que estamos obrigados a cumprir a vontade desta persoa, vai ser o investimento de todo este patrimonio na mellora, no arranxo e na adaptación do Hospital Asilo, e por todo iso quixemos simultaneamente, en todo este tempo, elaborar o proxecto técnico para adaptar ás normativas actuais o edificio. Para iso, o técnico municipal cifra o conxunto das obras necesarias en 1 500 000 euros, sen ter en conta o valor do mobiliario, dado que será necesario instalalo novo despois da importante actuación de modernización do edificio que se vai facer. Para iso, lévase varios meses traballando e coordinando coa Consellería de Política Social para que dea o visto e prace a este proxecto. Precisamente, no día de onte, mantívose unha nova xuntanza técnica para ultimar os detalles deste ambicioso proxecto".

O alcalde de Ribadeo declarou que "se fai evidente que as importantes cifras desta herdanza non son abondas para cubrir o custo das obras máis, a partir de agora, será cando outras administracións deberemos poñer enriba da mesa canto financiamento se poderá achegar para completar o necesario".

E engadiu: "finalmente, e non menos importante, tamén queremos recoñecer a vontade desta persoa que quixo que os aforros e os bens conseguidos na súa vida servisen para mellorar e para facer un entorno máis agradable na vida doutros moitos veciños e veciñas que un día foron del, a través da mellora do Hospital Asilo. Para iso, o Concello de Ribadeo faralle o recoñecemento público que merece o señor Francisco Moreda Pérez".

A esquela de F. Moreda, para saber (un pouco) máis:

Covid 19 no Hospital-Asilo de Ribadeo (II) . Evaristo Lombardero

 

BROTE DE CORONAVIRUS NO HOSPITAL ASILO DE RIBADEO (II) 

        Pasados vinteun días dende que se declarou oficialmente o brote de Covid-19 no Hospital Asilo de Ribadeo, trala notificación de 26 casos de infección vs enfermedade e dúas persoas presuntamente falecidas por esta causa (entre outras)  o concello de Ribadeo segue sen darse por enterado das diversas liñas informativas que apuntan a un fallo nos accesos ao hospital por persoas non autorizadas, que puideron transmitir a infección, e reduce á “rumoroloxía” calquer pista que non concorde ca sua versión dos feitos. 

        O tema é preocupante porque se non se recoñecen os feitos, tal como foron, e non se adoptan a medidas pertinentes para evitar contactos de outo risco, poderemos atoparnos con situacións similares nos próximos meses. 

        Pasemos revista brevemente aos antecedentes deste brote: 

        1.- O día 17 de setembro de 2020 a Consellería de Sanidade e mais a de Servizos Sociais da Xunta de Galicia asinaron un protocolo, publicado en forma de resolución, para a prevención da infección e control da mesma nos centros da terceira idade. 

       Neste protocolo queda perfectamente especificado que persoas poden acceder aos centros da terceira idade en Galicia e que medidas deben adoptarse para previr os contaxios. Inclúese polo tanto aos usuarios, familiares, persoal asistencial, persoal sanitario, etc. 

        2.- O dia 21 ou 22 de decembro declarouse un caso de infección dunha persoa que tiña acceso reiterado ao hospital asilo sen formar parte de ningún deses grupos incluídos no protocolo devandito. Presuntamente esta persoa, de ampla movilidade, puido ser o caso índice ou transmisor do brote que comentamos. Xa dixemos que non se trata de culpabilizar nin sinalar co dedo a ninguén, simplemente explicar as cousas como foron para corrixir os erros e que non se repitan.  

        3.- Os informes do Concello de Ribadeo, publicados repetidamente na páxina web non recoñecen a existencia deste caso inicial e polo tanto ocultan que no Hospital Asilo non se estaba cumplindo a resolución das consellerías anteriormente comentada. Dito de outro xeito: O concello de Ribadeo, único responsable da xestión do Hospital Asilo, non levaba un control estrito de entradas e salidas neste centro.  De ahí que os feitos coñecidos  por todo Ribadeo, a través de varios testigos presenciais, sexan tildados polo Sr. Alcalde de “rumoroloxía”   

        4.- Como xa temos dito, do que se trata, dende o punto de vista práctico, é de conseguir que se apliquen tódalas medidas preventivas posibeis, e no caso concreto das residencias da terceira idade que se cumpla rigorosamente o protocolo establecido pola Xunta de Galicia para estes casos,  que o concello de Ribadeo esqueceu dando pé a este brote que comentamos. Para eso, dado que a información oficial non funciona ou é tendenciosa é imprescindible que os veciños tomemos a dianteira e nos organicemos co gallo de conquerir o mellor futuro para todos. 

       Outro exemplo é o caso da nova residencia da terceira idade, onde a empresa CLECE  (de Florentino Pérez) foi substituída o día 31 de decembro por  outra empresa descoñecida en Ribadeo, operación comercial que o concello tamén oculta aos usuarios, familiares e veciños. Como non sabemos cales son as causas desa operación, nin as condicións dese novo contrato, nin quen negociou ese convenio e o concello non no lo quere dicir, temos que organizarnos, preocuparnos por conseguir información e esixir a garantía de que esa nova empresa estea capacitada para cumprir a misión e o vaia facer ca máxima seguridade para todos e todas. Iso é o que entendemos por información e participación democrática. 

Evaristo Lombardero Rico

 

Acceso á 1ª parte.

Progresión do coronavirus en Ribadeo (IV)

   Os datos varían, fanse vellos antes de ser publicados, porque corresponden a casos observados días atrás... Hai que ver a tendencia a longo prazo, e non sirven moito as predicións estatísticas individuais  para un concello coas normas cambiantes, precisamente ditadas para tentar cambiar a forma das gráficas e con elo, as espectativas vitais. A liña de axuste é máis unha constatación que unha proxección. Unha constatación que se vai voltando máis complicada de representar só porque hai máis datos acumulados no tempo.

   Fala o alcalde na última nota emitida con data de antonte (outra cousa é cando se colgou na web) "Estamos observando xa que logo, un descenso de casos neste gromo no Hospital Asilo ao tempo que un incremento paseniño e continuado dos contaxios no conxunto do Concello". Pois depende. Nos últimos días, si, e non tan paseniño. Pero en total, no concello, os 29 casos da primeira semana non foron superados aínda despois. Claro que incluían á xente do Hospital Asilo.

   Deixo a nota da alcaldía a continuación, e as entradas anteriores desta serie 'progresión do coronavirus en Ribadeo':

RIBADEO ACUMULA 24 CASOS NOS ÚLTIMOS 14 DÍAS

Contaxios por covid19

22/01/2021

Seguen a baixar os casos positivos por covid19 no Hospital Asilo de Ribadeo. O último cribado realizado hai dous días arroxa a cifra de 6 persoas contaxiadas, segundo ven de informar o alcalde, Fernando Suárez.

O rexedor dixo que "seguindo a estela das últimas notas de prensa emitidas, debemos falar dunha situación agridoce na situación do Hospital Asilo, aínda que a medida que o tempo vai pasando o número de casos, no seu conxunto, seguen a baixar". 

Suárez Barcia confirmou que "actualmente xa non quedan usuarios desprazados ao Cegadi (Centro Galego de Desenvolvemento Integral) pois as 2 persoas que quedaban alí, das 19 que chegou a haber, xa retornaron a Ribadeo".

O alcalde comentou esta tarde que "os responsables sanitarios do Hospital da Costa indícannos que o cribado feito hai dous días deu como resultado que os casos activos entre usuarios e persoal do Centro ascenden a 6 persoas. Tamén nos din que actualmente hai 2 persoas que permanecen no Hospital da Costa por mor do covid19. Polo tanto, no momento de facer esta nota de prensa temos un total de 8 persoas positivas en coronavirus. Sendo esta unha cifra importante, o certo é que xa queda moi lonxe das 26 que chegou a haber no momento de maior incidencia deste gromo".

Fernando Suárez contou que "con todo e iso, debemos indicar que hai dous días faleceu una persoa que aínda non dera negativo nas probas de inmunidade ao coronavirus. Tiña 92 anos de idade e presentaba patoloxías previas".

O rexedor insistiu en que "se segue valorando unha vez mais como moi positiva a actuación coordinada na aplicación dos Protocolos e Planes de Continxencia por parte da  dirección do centro e do seu persoal, así como a actitude dos residentes á hora de enfocar esta crise sanitaria.  E como sempre indicamos, manteremos informada á cidadanía sexa cal sexa a situación á que nos teñamos que enfrontar, coa confianza de que ter pasado xa polo pico de madurez deste gromo que se iniciou hai cinco semanas. Seguirémolo a facer a medida que vaiamos obtendo información, ben por nós mesmos ou ben proporcionada polas autoridades sanitarias autonómicas en canto nola vaian facilitando, sempre co mellor ánimo informativo que evite rumoroloxías ou situacións de confusión".

Sobre a situación global que se vive en Ribadeo o alcalde sinalou que "segundo os datos que vén de publicar a Consellaría de Sanidade no día de hoxe, Ribadeo aparece con 24 casos nos últimos 14 días. Estamos observando xa que logo, un descenso de casos neste gromo no Hospital Asilo ao tempo que un incremento paseniño e continuado dos contaxios no conxunto do Concello, polo que queremos insistir novamente na obrigada concienciación nas actuacións individuais e colectivas, como persoas e como sociedade, para cumprir a diario as recomendacións e as obrigas que as autoridades sanitarias nos indican. De todos nós dependerá que a cifra siga a subir nas vindeiras horas".