Arboricidio: documentos

    A raíz da protesta pola corta de árbores en Ribadeo, decidín ordear de xeito cronolóxico ata o presente algúns documentos que foron chegando a min, obviando as notas de prensa dos grupos políticos e evitando repeticións (as noticias soen saír en varios medios o mesmo día ou días sucesivos).

1.- 20241007 Informe de Servitec sobre a conveniencia da corta (a mesma empresa encargada da corta) ten esa data na sinatura. A pesar diso, hai fotos onde se observa unha cinta de delimitación e xente xa traballando, o que aparentemente non correspondería con dita data:

2.- 20241030 Día no que en teoría, segundo escrito posterior do alcalde, se produce a petición de corta, desprazamento da técnica municipal para informar e orde de corta,

3.- 20241105 Mobilización da ANPA, entrevista coa directora, que di que é cousa do concello, petición de informes e da paralización da corta. 

4.- 20241105 A raíz do comezo da corta, neste blog, Informe sucinto: actuación C.P. Gregorio Sanz

5.- 20241106 Continuación da poda, non da corta

6.-20241106 El Progreso A ANPA pide explicacións e estala a polémica

7.- 20241107 Na Voz de Galicia ADEGA denuncia ó Concello ante Seprona

8.- 20241108 Informe técnica ambiental concello:

9.-20241107 Dilixencia da alcaldía, na que ordea a corta e o informe anterior, así como afirma que a corta foi pedida pola dirección. A destacar que aparecen ordes orais anteriores que se sitúan no día 30 de outubro.

10.- Recepción dos informes pola ANPA. Entrega posterior de copia á dirección por parte da ANPA e solicitude da dirección ó concello para a súa obtención oficial, que daría lugar ó envío tamén posterior da carta da dirección ós pais.

11.- 20241116 Aparece na Comarca del Eo: 

Arboricidio

POR ISABEL BRAVO BOGO

EXMESTRA DO CEIP GREGORIO SANZ DE RIBADEO

O que está ocorrendo estes días no Colexio Público Gregorio Sanz non é nada novo. As rapazas e os rapaces que agora andan polos corenta anos (xeración do actual alcalde de Ribadeo) comezaron a súa etapa escolar nun centro no que o espazo natural era o que máis salientaba: os edificios eran vellos pero o campo e as árbores eran os que o facían fermosísimo e marabilloso. Xogaban ás agachadas, ás casiñas, corrían polo prado...

As mestras e mestres que chegaban para ensinar alí quedaban gratamente impresionados pola extensa zona verde e aquelas árbores preciosas.

Foi despois dunha Semana Santa. Chegamos ao colexio e vimos que cortaran ao redor de oito ou dez árbores, non recordo ben, e algunhas de nós pedimos explicacións. Algunha resposta foi que esas árbores lles producían "aler- xia" aos veciños e outras non as lembro.

Máis adiante, o Concello decidiu construír unha pista de fútbol 7 asfaltada, á cal eu me nego a chamarlle campo, que iso sería acaído para o deserto do Sáhara, pero non en Galiza, onde temos herba e campo dabondo. 

Expresei o meu desacordo no Claustro de mestres, falei co presidente da ANPA e mesmo falei co Concelleiro de Medio Ambiente. Contestáronme que o colexio non era meu. Nesa ocasión derrubáronse unha ducia de árbores, todas especies autóctonas e con moitos anos de vida.

Noutra ocasión, as que quedaban foron sometidas a unha "poda baixa"; é dicir, cortadas polo medio do tronco. Máis adiante houbo algunha protesta porque algún neno ou nena se mancara cun ourizo dos fermosos castiñeiros da zona de Educación Infantil. A proposta da dirección foi, como non, a corta. Nesta ocasión escoitáronme e aplicóuselles unha poda.

A resultas de todo isto, eu negueime a participar co meu alumnado na celebración do Día da Arbore, pois realmente entendín que non era coherente que os/as nenos/as viran como se remataba con árbores de moitos anos e se lles quería facer crer que se era moi amigo da natureza plantando unha de 40 cm.

Xa o dicía Rousseau alá polo 1672 criticando os homes que destruían a natureza, que "mesturan e confunden os climas, os elementos e as estacións, mutilan o seu can, o seu cabalo e o seu escravo, non queren nada tal como saíu da natureza, nin o mesmo home, a quen doma ao seu capricho coma as árbores do seu horto".

Por outra banda, Heike Freire defende que os nenos e as nenas que teñen un maior achegamento á natureza desenvolven actitudes máis positivas cara a si mesmos e cara aos demais, e mesmo desenvolven importantes valores de compromiso e respecto polo planeta. Tamén son quen de reducir os niveis de estrés, algo que actualmente é esencial. Abun dando no asunto que nos ocupa, en Finlandia a ensinanza sobre o cambio climático forma parte de cada materia.

Sabemos que as árbores, mediante a fotosíntese, consomen o CO2 ambiental, emiten osíxeno e que aproximadamente un terzo das emisións de orixe humana de CO2 son absorbidas polos ecosistemas terrestres, principalmente polas árbores.

E só, para finalizar, eu preguntaría a aqueles alumnos e alumnas que hoxe teñen 40 anos se recoñecen a escola na que fixeron a Educación Infantil e a Educación Primaria e se lles gusta o que ven agora. Se nos dedicamos a educar, intentemos que o noso alumnado sexa crítico e valore o noso. Tratémolos con respecto e non insultando a súa intelixencia.

12.- 20241120 Xuntanza da ANPA e petición dunha xuntanza con dirección e alcaldía, sen resposta polo momento.

13.- 20241126 No El Progreso, noticia da Execución de 'obras' (con talas) polo concello

14.- 20241127 No blog (e logo, na Comarca del Eo) o artigoCorta na praza

15.- 20241128 Na Voz A directora nega ter pedido a corta

16.- 20241128 No blog Comunicado da plataforma pro defensa das árbores de Ribadeo

17.- 20241129 No El Progreso nova da Creación da plataforma en defensa das árbores da vila de Ribadeo e nota de prensa

O Domingo 1 de decembro, á hora de rematar isto, é a información da que dispoño.

Adeus ás árbores

Onte a mediodía apareceron cortadas as árbores da rúa peonil. É pouco o que tarda en facer unha tala de árbores novos, e abondo o que tardan en medrar. É certo que algunha das árbores xa fora arrasada por vándalos, pero en xeral aínda fornecían unhas florificacións curtas pero fermosas.
Xa non.
A cousa ven a sumarse á poda de árbores na zona do cemiterio comezada en outubro, e alomenos a min lémbrame a pola/tala de comezos de década no xardín, na que boa parte das árbores de grande porte que alí había secaron despois de ser cortado o tronco de tal xeito que non deixaba ningunha rama visible, ningunha posibilidade de supervivencia.
Tamén contrasta co anuncio de posta de árbores na zona de estrada cedida por Fomento, e fai preguntarse cantos anos estarán as árbores vivas antes de seren cortadas.
--
Nota posterior:
Despois de falar con varias persoas, xa sei a causa da tala: unha enfermidade que xa secara algunha das árbores, a gomose, e comezara a atacar xa o resto. De feito, vin a sección dun tronco cortado e xa estaba seco na súa meirande parte. Espero recibir en días próximos un informe que será colgado como artigo con referencia a este.

Concentración en defensa e protección das nosas árbores

    Onte á noite tivo lugar a concentración convocada pola plataforma en defensa das árbores da vila de Ribadeo. 250 persoas nunha noite desapacible diante do concello, cun acto principal: a lectura do manifesto elaborado para a ocasión. Pancartas, coros e a lembranza de que esta concentración é o comezo, non o final, acompañaron á lectura do manifesto que deixo abaixo en audio e, ó final, en texto:

    Para palpar o ambiente, algunha das fotos tomadas por Suso, Isabel e Mati:

    Texto do manifesto:

BOA NOITE, AMIGAS E AMIGOS!

O primeiro de todo, graciñas por acudirdes a esta convocatoria que ten lugar nesta desapracible e húmida noite de decembro.

Hoxe estamos aquí moita xente amosando a nosa protesta e repulsa polo acontecido nestas últimas tres semanas: as podas innecesarias e indiscriminadas e as cortas salvaxes perpetradas polo Goberno Municipal en varios espazos emblemáticos da vila: nas estradas do Faro e cemiterio, con anterioridade no parque infantil, Forte de S. Damián, Colexio Público Gregorio Sanz, nesta mesma praza do lado, etc.

Pero tamén estamos aquí para evitar que este Goberno Municipal siga con proxectos que pasan por levar a cabo actuacións similares no Parque de S. Francisco, na Praza do Campo (fronte a nós), nas vivendas sociais situadas cara ó Convento das Clarisas...

Esta situación é inaceptable a un proxecto dun Ribadeo máis habitable e saudable, e moi contraria á imaxe que debe dar a vila.

ESIXIMOS que se poña fin a esta exaltación do cemento en detrimento dun hábitat verde; PEDIMOS que finalice XA a destrución do noso patrimonio natural.

Moitas das especies que se cortaron ou que se podaron inadecuadamente, necesitaron de 20 a 30 anos para acadaren o desenvolvemento que mostraban. Unha motoserra necesitou poucos minutos para acabar coa vida do que son un dos máis grandes tesouros dos que dispón o noso planeta.

AMIGOS, AMIGAS, as árbores son máis que madeira e follas, SON VIDA.

As árbores transforman o dióxido de carbono en osíxeno. Nelas viven insectos, paxaros e pequenos mamíferos. Mesmo cando unha árbore morre segue dando vida en forma de fungos. Dan froitos e sombra, a súa contemplación énchenos de ledicia e plenitude. Algúns facultativos prescriben curas de natureza para baixar os niveis de estrés.

Os espazos con árbores son indispensables nos contornos urbanos porque melloran a calidade do aire. Unha grande árbore pode absorber ata 150 kg de gases contaminantes nun ano. Plantalas ó redor dos edificios arrefría o aire entre 2 e 8 graos.

Cortalas de forma basta e indiscriminada antes de analizar e xustificar moi ben por que se fai, é unha temeridade. Antes de facer un traballo tan agresivo débese levar a cabo un estudo onde se especifique moi claramente qué árbores están enfermas (seguramente irrecuperables) e aquelas nas que é necesaria unha poda por motivos de seguridade.

AMIGAS, AMIGOS, ás veces invádenos a sensación de que vivimos nun mundo do revés. Atopámonos nun escenario de cambio climático moi preocupante, aseveración contrastada e confirmada pola comunidade científica; pola contra, sabemos que hai xente que o cuestiona ou que o nega.

A loita contra este cambio climático pasa por diferentes accións que teñen que vir deseñadas polos estamentos que nos gobernan. Desde o estado, pasando polas comunidades autónomas e tamén dos concellos, loxicamente. Aquí, en Ribadeo, estamos asistindo atónitos á supresión e á non creación de novos espazos verdes (PXOM DE 2014), á corta e poda antiecolóxicas de árbores de moitos anos de vida. Todos, -as nós asistimos impotentes, e ó principio incrédulos, a estes feitos. POR ISO ESTAMOS AQUÍ, para BERRARMOS CON UNHA ÚNICA VOZ: BASTA XA!

Desta volta principiou a polémica pola corta de árbores (algunha de máis de 30 anos) no Colexio Público Gregorio Sanz, lugar que reunía as condicións idóneas para ser un espazo de liberación da catividade do cemento para devir nun espazo que cada ano que pasa está máis inmerso nel.

O feito de que unha nena ou neno se manteña en contacto coa terra é algo que lle vai proporcionar seguridade e calma. Xogar no campo, pisalo, respirar aire puro, é algo que nada ten que ver con facelo no asfalto.

Sabemos que para loitar contra as ondas de calor, cada vez máis intensas e longas, unha das solucións pasa por crear illas verdes; isto é, espazos con herba, árbores e plantas que fan o efecto de rebaixar a temperatura, xusto á inversa do que ocasiona o asfalto.

Ningunha xeración ten tanto que perder polos efectos do cambio climático como a Xeración Z. Pechar os ollos a esta realidade cuxas consecuencias son cada vez máis tanxibles NON É UNHA OPCIÓN.

Moitas e moitos dicimos que é tempo de actuar e o momento é AGORA.

Como final, queremos lembrar con todos vós este proverbio indio:

“A TERRA NON É HERDANZA DOS NOSOS PAIS

SENÓN UN PRÉSTAMO DOS NOSOS FILLOS”.

Moreas de bicos e graciñas. Boa noite!

A atención das árbores en Ribadeo

A atención das árbores en Ribadeo

    O coidado das árbores está esta tempada na mirada dos ribadenses. Se esta mañá publicaba aquí mesmo a 'Nota Informativa da Plataforma pola Defensa das Nosas Árbores', deixo agora unha noticia complementaria, tendo como actores a oposición no concello de Ribadeo, tanto BNG como PSOE. Trátase da presentación da petición dun pleno extraordinario sobre o tema. A destacar que, legalmente, e tras ter sobrepasado o número de concelleiros necesarios (sobraba cos do BNG, pero presentan unha fronte común co PSOE), o pleno debe convocarse den 15 días útiles. De non ser convocado, automáticamente se convoca para 10 días despois (tamén laborables, é dicir, o 26 de febreiro se non están mal feitas as contas) ás 12 da mañá. É dicir, teremos un pleno adicado a dito tema como moito en pouco máis dun mes.

    A transcrición da imaxe:

"Ao abeiro do indicado no artigo 46 da Lei Reguladora de Bases do Réxime Loca, os concelleiros e concelleiras Pablo Vizoso Galdo, Vicente Castro Reigosa, Raquel Ferreira Álvarez, Marcos Antonio Villamil Martínez, Martín Graña Pérez e Marta García Rey, representando máis dunha cuarta parte da corporación municipal, solicitan a convocatoria dun pleno extraordinario para tratar do seguinte punto único:

1. Debate e aclaración sobre o acontecido coas cortas de árbores en diferentes lugares do concello e a manifestada intención do proxecto de reforma sobre o Campo de San Francisco.

Nas últimas semanas e meses asistimos á tala indiscriminada e sorpresiva en diferentes lugares do noso concello, que afectou especialmente o Centro Educativo Gregorio Sanz e á praza Pancho Maseda. Todas estas actuacións provocaron a indignación e reacción social de diferentes colectivos. Ademais, nos últimos meses, recibimos a través dos medios de comunicación e en conversas información sobre a intención do goberno municipal de acometer unha reforma integral do campo de San Francisco.

Polo exposto, proponse debater o punto e aprobar os seguintes acordos:

1. Paralización inmediata da tala de árbores, agás para casos debidamente xustificados con informes técnicos previos.

2. Calquera actuación hipo´tetica ou futura sobre o Campo de San Francisco deberá contar coa exposición pública previa á licitación do mesmo, para permitir a participación da veciñanza.

En Ribadeo, a 22 de xaneiro de 2025

"

    Deixo tamén a nota de prensa anunciándoo, coa foto de Pablo Vizoso e Marta García que acompañaba:

 

"A oposición ao completo solicitará a convocatoria dun pleno extraordinario para aclarar o acontecido cas cortas de árbores e o plan de reforma sobre o campo de San Francisco.

Os concelleiros do BNG de Ribadeo e a concelleira do PSdG solicitarán a convocatoria dun pleno extraordinario para aclarar o acontecido nas últimas semanas. Preguntaremos sobre as cortas masivas de árbores realizadas polo goberno municipal, así como as súas intencións de reforma integral sobre un dos espazos máis emblemáticos de Ribadeo: o campo de San Francisco.

A oposición en pleno realiza esta solicitude despois das reaccións e demandas dunha gran parte da veciñanza de Ribadeo, ignorada e ninguneada de xeito reiterado polo alcalde."

NOTA INFORMATIVA DA PLATAFORMA POLA DEFENSA DAS NOSAS ÁRBORES

NOTA  INFORMATIVA DA PLATAFORMA POLA DEFENSA DAS NOSAS ÁRBORES

 

        Como xa temos informado, o pasado dia 26 de novembro un grupo de veciñas s e veciños de Ribadeo decidimos constituírnos na Plataforma para a Defensa das Árbores da Vila e do Concello diante das repetidas cortas que se viñeron producindo nos últimos meses.

        Nas xuntanzas deste colectivo decidiuse pedir unha entrevista ao Sr. Alcalde e convocar unha concentración veciñal para deixar constancia do malestar  existente na sociedade ribadense.

        Da concentración, que tivo lugar o martes, dia tres de decembro, xa deron conta os medios de comunicación e nas fotos pódese apreciar que pese a estar un tempo moi desapacible asistiron como mínimo unhas duascentas persoas.

        Da entrevista co Sr. Alcalde que se celebrou o mesmo martes ás nove da mañá e á que asistimos seis persoas, imos dar conta de seguido, se ben adiantamos que non é doado por ser unha entrevista que non tivo unha liña regular, con participación de todas e todos os asistentes e numerosos comentarios e valoracións persoais de difícil comunicación.

       Os aspectos que queremos suliñar da devandita entrevista son os seguintes:

    

1º Segundo o Sr. Alcalde, as cortas de árbores no Colexio Público foron realizadas tras un informe técnico por unha empresa acreditada. Deixando aparte que se alude á suposta infalibilidade dos técnicos cando non hai outros argumentos, debemos suliñar que o devandito informe –que xa coñecíamos uns días antes por unha vía paralela– foi redactado pola mesma empresa que despois fixo a corta ordenada pola alcaldía. Como non queremos entrar en insinuacións nen suspicacias só diremos que este procedemento de contratación entra no que se chama un clarísimo conflito de intereses e que neste contexto os informes técnicos quedan autodescualificados sen entrar sequera a lelos, como pode entender calquera estudante de segundo de primaria. Pola outra banda temos acreditado con documentos oficiais que as datas que figuran nalgún destes informes son posteriores ás cortas realizadas no colexio.

 

2º O Sr. Alcalde repetiu ata a saciedade as accións e omisións dos gobernos anteriores, insinuado que a nosa plataforma podería ter algunha relación cos partidos políticos ou persoas de gobernos anteriores. Temos particular interese por suliñar que esta é unha insidia política e que esta plataforma non ten a mais mínima relación con ningún grupo ou partido político real ou imaxinario.

 

3º A pregunta directa de se existe un proxecto de reformas no campo de Sta. María e no Parque Municipal que suporían a corta de mais árbores, o Sr. Alcalde manifestou que non existía tal proxecto.  Sin embargo ao día seguinte atopamos tres  declaracións á prensa e radio  do Sr. Alcalde dos últimos meses nas que afirma  que se van realizar reformas nos parques sen concretar. Diante de esta contradición, que nos abstemos de cualificar, estaremos á espreita de calquera movemento na liña de novas cortas de árbores e esiximos que se publiquen eses proxectos e non se actúe por sorpresa ás sete da mañá como veu sucedendo. Asemade preguntóuselle ao Sr. Alcalde sobre un suposto proxecto de cortar as sete arbores que existen enfronte das vivendas sociais, na rúa Clemente Martinez Pasarón e respostou que existía ese proxecto, que se ían suprimir os colectores de lixo subterráneos por motivos “técnicos” e que non se ían cortar as árbores, pero non presentou o proxecto nin prometeu presentalo ao público.

 

        Nos próximos días anunciaremos un acto público para informar e debater sobre este asunto e anunciamos que seguiremos loitando por evitar que se produzan mais cortas de árbores inxustificadas no concello de Ribadeo e que se publiquen os proxectos de obras que podan afectar ao benestar, á calidade de vida da veciñanza e á imaxe de un Ribadeo verde, moderno e humanitario.

 

PLATAFORMA POLA DEFENSA DAS ARBORES DO CONCELLO DE RIBADEO. 9/12/2024

 

Foto de orixe descoñecida. O parque de Ribadeo.

NOTA INFORMATIVA DAS VECIÑAS DAS VIVENDAS SOCIAIS SOBRE AS NOSAS ÁRBORES

 

NOTA INFORMATIVA DAS VECIÑAS DAS VIVENDAS SOCIAIS SOBRE AS NOSAS ÁRBORES

O pasado día 9 de xaneiro o colectivo de veciñas das vivendas sociais da Rúa Clemente Martínez Pasarón presentamos no rexistro do Concello de Ribadeo un escrito asinado por máis de 150 persoas no que solicitábamos información sobre un proxecto de obras e reforma na zona verde próxima ós nosos domicilios. Como é sabido nesa zona existen sete árbores e uns contedores de lixo que prestan un servizo inestimable á veciñanza, e os comentarios que circularan os meses anteriores facían sospeitar dun proxecto de supresión dos contedores e das árbores, sen que estivese claro a quen podería beneficiar esa reforma.

Por este motivo fixemos a recollida de sinaturas ca solicitude de que se nos informase a nivel oficial do proxecto concreto do concello para non ter que andar con dimes e diretes que non conducen a nada práctico.

Sin embargo, transcorridos vinte días non temos recibido ningún tipo de resposta por parte do concello e observamos movementos de persoal que puideran estar en relación ca devandita obra que podería levarse a cabo de forma sorpresiva como sucedeu cas cortas de árbores no colexio de EXB e na praza Pancho Maseda.

Como se pode comprender, a falla de resposta non fai senón acender os temores da veciñanza, dar pé a máis rumores e á sospeita de que se van cortar as árbores e suprimir a zona verde sen causa que o xustifique.

Pola nosa banda reiteramos o dereito das veciñas a coñecer os proxectos do concello que nos afectan directamente e solicitamos ter acceso a un proxecto realizado e financiado con recursos de todos cidadáns.

Asemade lembramos a todos os ribadenses que este non é un proxecto que nos afecte só as persoas que residimos preto da zona que se pretende reformar, xa que se se remata suprimindo as árbores e a zona verde será afectado o benestar de todos os ribadenses e visitantes.

Comunicado sobre árbores e Ribadeo

    Onte tivemos unha xuntanza informal da Plataforma pola defensa das nosas árbores. De alí saíu unha nota de prensa que adxunto, e á que incorporo antes un plano do parque coa descrición das árbores que me faltou de poñer na entrada www.ribadeando.com/2024/12/o-parque-de-ribadeo-no-seculo-xx-do.html e deixo por poñer para máis adiante un moi pequeno resume da xuntanza que parecía mesmo unha concentración polo número de xente que nos achegamos.

    O folleto, feito con motivo do día da árbores de 1988 pola Del. de Educación do Concello con debuxos de Fermín Rodríguez baixo indicación indicación de Vicente Méndez, daquela xardineiro do concello. Teño que agrader á actual bibliotecaria, Mónica Martínez, a súa procura: 

 

    Tendo falado na xuntanza sobre facer unha lista de árbores, transcribo doutro xeito e con algunha corrección a última folla, incluíndo o nome, nome científico e número de exemplares, por se poidera servir cara ó futuro:

    Árbores no Parque de Ribadeo en 1988:

-    Zona do Parque de San Francisco (parque dos nenos, parque da igrexa, zona do palco da música...)

Choupo do Canadá / Populus canadensis - 12 exemplares

Choupo branco / Populus alba - 4

Plátano do Oriente / Platanus orientalis - 8

Castiñeiro das Indias / Aesculus hippocastanum - 2

Pradairo / Acer platanoides - 2

Robinia (Falsa Acacia) / Robinia pseudoacacia - 6

Salgueiro Chorón / Salix babilonica - 2

Acacia de tres espiñas / Gleditsia triacanthos - 1

Magnolia / Magnolia grndiflora - 1

-    Zona da Praza de España (Parque do Viejo Pancho, Parque do Cantón)

Castiñeiro das Indias / Aesculus hippocastanum - 16

Olmeiro Común (Negrillo) / Ulmus campestris - 2

Olmeiro (Olmo) / Ulmus pupila - 2

Olmeiro (Olmo) / Ulmus pendula -2

Cinamomo / Melia azederach - 5

Pradairo / Acer platanoides - 21

Robinia (Falsa Acacia) / Robinia pseudoacacia -1

Washingtonia / Washingtonia filitus -4

Moreira Branca / Morus alba (var. pendulae) -4

Cedro / Cedrus atlantica - 1

Palmeira Canaria / Phoenix canariensis - 5

Tuia de Oriente / Thuja orientalis -1

Tuia / Thuja plicata - 1

    O comunicado enviado á prensa:

 

COMUNICADO DE VECIÑ@S DAS VIVENDAS SOCIAIS DA RÚA CLEMENTE MARTINEZ PASARÓN

   Un grupo de veciri@s da vivendas sociais estamos recollendo sinaturas de apoio ao escrito que abaixo se reproduce. Como se pode ver no texto, o motivo de inquedanza está plenamente xustificado. En poucos días estará rematada recollida e serán presentadas no rexistro do Concello de Ribadeo.

 Sr. Alcalde de Ribadeo:

     Os abaixo asinantes, veciñas e veciños residentes nas vivendas sociais da Rúa Clemente Martínez Pasarón e colindantes desexamos
comunicarlle a nosa inquedanza polos rumores de unha posible reforma urbanística do espazo próximo aos nosos domicilios que suporía a tala das árbores alí existentes, a eliminación do espazo verde e a supresión dos vertedoiros de lixo subterráneos que prestan un inestimable servizo, sen cheiros nin outro tipo de incomodidades.
     Dado que descoñecemos o que terían de certo ditos rumores, solicitamos se nos facilite información oficial que confirme ou desminta a existencia do devandito proxecto.
    Asemade debemos transmitirlle as queixas de numerosos veciños e veciñas polo temor de que dito proxecto poda facerse realidade e que se teña en conta esta opinión e se deixe en suspenso o devandito proxecto en caso de existir.

    Ribadeo, 4 de Decembro de 2024

NOTA INFORMATIVA DA PLATAFORMA POLA DEFENSA DAS NOSAS ÁRBORES

    Adxunto deixo nota de prensa sobre o acto de onte da plataforma pola defensa das nosas árbores, xunto con algunha foto das tomadas por Suso. Axustar á nota que o acto durou perto de dúas horas, das que máis dos tres cuartos foron a raíz de intervencións dos asistentes, manifestación dos fortes sentimentos suscitados.

NOTA INFORMATIVA DA PLATAFORMA POLA DEFENSA DAS NOSAS ÁRBORES

    Na tarde-noite de onte, xoves, celebrouse a charla informativa anunciada por este colectivo na Casa do Viejo Pancho de Ribadeo.

    Antes do comezo dedicouse un minuto de silencio pola memoria de Rejane, a  muller asasinada en Viveiro nun novo crime machista e convidouse aos asistentes a participar na concentración de repulsa que terá lugar hoxe, venres as 20:00, na Praza do Oito de Marzo.

    No acto participaron mais de cincuenta persoas con moitas intervencións e un intenso debate, que deron conta da inquedanza social que están suscitando as talas reiteradas e inxustificadas de árbores en diferentes puntos do concello e o temor a que estas sigan adiante e se estendan a outros lugares no sucesivo. Tamén se deu conta da falla de información sobre a reforma do Parque Municipal e o Campo de Santa María, anunciada en varias ocasións polo Sr. Alcalde nos medios de comunicación, pero negada por este na xuntanza celebrada no Concello o día 3 de decembro con seis membros de esta plataforma.

    No acto participaron tamén varias persoas da Xunta Directiva da ANPA do Colexio Gregorio Sanz que amosaron a súa sorpresa pola corta indiscriminada de moitas árbores sen información previa, e subliñouse que algúns dos informes relativos a esta intervención foron realizados con posterioridade á devandita corta. Algúns destes informes foron proxectados polos relatores e destacouse que as datas de redacción destes documentos presentan contradicións evidentes coas declaracións da alcaldía.

    Pola outra banda salientouse que un dos informes asinado por unha empresa privada, polo demais a mesma que realizou as cortas, xustifícaas, entre outros motivos, en base a que 'as árbores dan sombra e as follas caen nos canalóns e despois hai que limpalos' (sic). Tamén se chamou a atención sobre o feito de que as cortas se realizasen en días lectivos e estando os nenos nos patios de recreo. Sobre o proxecto, recoñecido polo Sr. Alcalde, de suprimir os contedores de lixo diante das vivendas sociais da Rúa Clemente Martinez Pasarón salientouse que fan un estimable servizo e que poden ser reparados sen excesivo custo e mesmo, segundo persoas residentes nestas vivendas dende hai mais de 30 anos, non é certo que se vexan ratas como se intentou usar de xustificación.

    Como proxectos para o futuro acordouse estar vixiantes a calquera nova actuación do Concello, esixir unha información e transparencia que non existiu ata a actualidade, seguir reuníndose periodicamente e convocar actos públicos de rexeita cando se considere necesario.

Ribadeo, 20 de Decembro de 2024 

PLATAFORMA POLA DEFENSA DAS NOSAS ÁRBORES

 

NOTA INFORMATIVA DA PLATAFORMA POLA DEFENSA DAS NOSAS ÁRBORES

NOTA INFORMATIVA DA PLATAFORMA POLA DEFENSA DAS NOSAS ÁRBORES

O noso colectivo ven de presentar no Rexistro do Concello de Ribadeo as sinaturas recollidas da veciñanza contra as cortas indiscriminadas de árbores no Colexio Público e noutros puntos do casco urbano, e solicitando que se repoñan as árbores derrubadas, que non se prodiguen estas cortas no sucesivo e que se informe ao vecindario dos proxectos de obras no Parque Municipal, no Campo de Santa María e fronte das vivendas sociais que foron anunciadas polo Sr. Alcalde nos medios de comunicación.

En total recolléronse 541 sinaturas, o domingo, día 12 de xaneiro na Praza de España e o mércores, día 15, no mercado, que non chegaron a catro horas.

Destes datos cómpre suliñar o seguinte:

1º Nos últimos anos nunca se recolleron tantas sinaturas por colectivos sociais, que no mellor dos casos nunca chegaron ás 350.

2º Faltan por contabilizar as que se están recollendo por medios telemáticos, que a día de hoxe pasan das 300 e das que daremos conta no seu momento.

3º A estas hai que engadir as presentadas polas veciñas das vivendas sociais, que pasan das 150.

En resume, tendo en conta que esta recollida de sinaturas produciuse no mes de xaneiro, en poucas horas e en condicións climáticas moi adversas, pode entenderse que en Ribadeo existe unha grande sensibilidade social en relación cas cortas indiscriminadas de árbores e un temor xustificado a que estas se extendan nos próximos meses. Maiormente cando o Concello segue sen dar unha información axeitada dos seus proxectos e existen moitas dúbidas e contradiccións nas declaracións do Sr. Alcalde.

Agardamos que se teña en conta esta opinión de un sector significativo de veciñanza e seguiremos na teima de vixiar e denunciar novas cortas en caso de chegarse a producirse e pular por un Ribadeo mais verde, onde as árbores conviden a unha maior proximidade ca natureza, unha mellor convivencia, un medio ambiente máis sano e uns espazos públicos máis atractivos para os visitantes.

PLATAFORMA POLA DEFENSA DAS NOSAS ÁRBORES

NOTA INFORMATIVA DA PLATAFORMA EN DEFENSA E PROTECCION DAS ÁRBORES

NOTA INFORMATIVA DA PLATAFORMA EN DEFENSA E PROTECCION DAS ÁRBORES

         O próximo domingo, día 12 de xaneiro, ás 12 da mañá este colectivo colocará unha mesa informativa e para a recollida de sinaturas na esquina da Praza de España con Catro Calles. O escrito, que presentaremos no Concello de Ribadeo, é o que aquí se expón. Poden asinar tódalas persoas que o desexen.

        Sr. Alcalde de Ribadeo:

 

      As veciñas e veciños de Ribadeo abaixo asinantes, desexamos transmitirlle o noso rexeitamento polas recentes cortas de árbores, tanto no Colexio Público como en outros puntos do concello que consideramos inxustificadas e arbitrarias, e o noso temor de que se sigan producindo no sucesivo en outras zonas.

       Dende o noso punto de vista as árbores son absolutamente necesarias nos espazos urbanos para manter un ambiente saudable e de relación ca natureza, ademais das súas funcións amplamente coñecidas de depuración do aire degradado polo tráfico rodado e diversas actividades antrópicas, ademais de mitigar os efectos do cambio climático e outros condicionantes naturais.

       Pola outra banda, o impacto educativo da súa presencia, nunha sociedade atenazada polo uso especulativo do solo, non deixa de ser outro motivo de peso para loitar por un urbanismo compatible coa maior proximidade posible ca vida natural.

       Desexamos transmitirlle ás próximas xeracións un Ribadeo máis cordial e máis humano, onde a convivencia e a concordia nas rúas e nos lugares públicos se vexan favorecidas por espazos amplos e verdes nos que se sinta latexar a natureza en perfecta simbiose ca vida humana, e agardamos que se existe algún proxecto de derrubar máis árbores se tomen en consideración este tipo de argumentos e se propoña o obxctivo de repoñer as árbores cortadas cas variedades axeitadas a cada zona.

      Reciba un saúdo

 

PLATAFORMA EN DEFENSA E PROTECCION DAS ÁRBORES

 

Ribadeo, 7 de Xaneiro de 2025

 Nota:

A máis da mesa de recollida de sinaturas, está aberta unha petición en Change.org: https://www.change.org/p/paremos-a-corta-dos-%C3%A1rbores-de-ribadeo-e-a-s%C3%BAa-contorna

Unha entrevista

Pedra nunha obra do concello

 Unha entrevista

    O martes 3 de decembro pola mañá tivo lugar unha entrevista entre un grupo de seis persoas, tres mulleres e tres homes, do movemento de defensa das árbores de Ribadeo, e o sr. alcalde.

    Coido que unha entrevista así, de case unha hora, pódese contar con moito detalle e mesmo perder a perspectiva, polo que tentarei facer un curto resume obxectivo e aséptico, illando do relato correspondente cousas como que o remate foi o levantamento do grupo como protesta da actitude do alcalde ou a acusación que se me fixo de mentir, á que puiden replicar cun documento asinado polo propio alcalde onde dicía exactamente o que eu estaba dicindo.

    Ó comezo, establecemos os puntos que íamos a tratar: a necesidade de considerar a opinión da xente antes da corta de árbores, e nese sentido, o parar as cortas, e a restitución do que se puidera.

     Falouse de diversos temas relacionados coa xestión das árbores, na que se incluíron outras obras, tanto pasadas como anunciadas ou previstas polo concello xa dende finais de 2022.

    Expúxoselle a precariedade dos informes no caso do colexio, non aceptando o alcalde dita precariedade. Enfrontáronse feitos, con datas incluídas, distinguíndoos ben de opinións para tentar ter unha base para falar. O sr. alcalde dixo que non ía haber intervención coas árbores nin en Clemente Martínez Pasarón nin no parque (máis aló da palmeira que se tería intentado curar), e que nunca dixera que se ían cortar árbores, ó que se lle respondeu citando unha nova de prensa de 2022 (La Comarca del Eo, 30 de decembro de 2022, p.3). O alcalde puxo en dúbida que se usaran os contedores de Clemente Mtz. Pasarón fronte o mantido polas veciñas asistentes, que discutiron a afirmación do alcalde de que os contedores soterrados eran un niño de ratas. Afirmou o sr. alcalde que as árbores da praza de Pancho Maseda causaban humidades e non eran autóctonos, deixando pasar por parte dos asistentes que algúns cortáranse e algún magnolio arrincárase coa raíz, sendo totalmente aproveitable. Falouse das árbores do cemiterio, do aproveitamento particular dos restos do cortado no colexio e de máis cousas, pero non se chegou a ningún acordo, nin se obtivo resposta de cando ía ser a reunión a tres (coa directora do C.P. e alcalde) pedida pola ANPA a modo de careo para clarificar os feitos, ou outras cuestións propostas. O que si se obtivo foi a acusación de politizar a xuntanza e torpedeala, sendo como foi pedida polo grupo.

    En fin, habería moito máis que dicir desta xuntanza sen froito e duración de case unha hora, que se afirmou que non se repetiría por non ter pensado conceder unha xuntanza semellante.

    Dase difusión a este resume unha vez pasada a manifestación convocada para o mesmo martes pola tarde, da que se falará aparte.

PLATAFORMA POLA DEFENSA DAS NOSAS ÁRBORES. NOTA INFORMATIVA

PLATAFORMA POLA DEFENSA DAS NOSAS ÁRBORES

NOTA INFORMATIVA

Ribadeo, 20250227

Dende a Plataforma pola defensa das árbores de Ribadeo queremos amosar o noso agrado pola poda realizada esta mañá (xoves 27 de febreiro) na rúa Clemente Martínez Pasarón. Consideramos que se fixo no momento axeitado e respectando as árbores afectadas. Os pequenos defectos observados, como a escasa aplicación de pasta de protección, non invalidan unha actuación que se encamiña cos criterios que vimos defendendo.

Cremos que é conveniente un seguimento do mantemento das nosas árbores por parte da xente do pobo, entre a que nos atopamos, e así o seguiremos a facer.

Por outra banda, felicitámonos polo feito de que as nosas accións en defensa das árbores do noso Concello vaian dando froito.

Non é só a paisaxe. Somos nós: de Utopía a Distopía

Non é só a paisaxe. Somos nós: de Utopía a Distopía

    Estes días cheguei a unha serie de fotos e imaxes construídas, mesmo debuxos, diferentes, e en diferentes lugares da rede, cunha semellanza: o aproveitamento da sombra dunha árbore (xeralmente, dunha árbore, pero tamén, con outras orientacións interpretativas, doutros obxectos, como galiñas á sombra dunha sinal de tráfico) por parte de xente e/ou outros animais nun día de Sol 'de xustiza'. Nesas imaxes con seres a resgardo do Sol grazas a outro ser vivo e verde, que tamén nos subministra de osíxeno mentres nos protexe, soe acompañarse unha lenda do tipo "máis árbores, menos coches" ou semellante, a modo de reforzo expresivo da idea representada.

    Por suposto, estou de acordo coa idea que pretenden, manifestada no pé de imaxe ou mediante diálogos dun ou outro xeito. Mais a interpretación das imaxes por medio dunha petición asociada a unha sentencia, como a citada "máis árbores, menos coches", soe quedarse moi curta. As imaxes usadas amosan unha realidade que vai máis aló da interpretación rápida e chusqueira. En particular, a necesidade de protexernos do Sol; de algo que, sabemos, nos dá a vida na Terra, pero tamén, recibido en 'moita cantidade', nola quita, e o perigo incrementado ó asocialo como símbolo de altas temperaturas / cambio climático. Ou a chamada á atención sobre a falta de árbores, ata o de agora con tendencia a ser eliminadas da paisaxe urbanizada por aquelo de que quitan espazo e ademais, hai que mantelas, deixarlles terra (algo, como todos sabemos, que 'mancha'), regalas, porque o asfalto do seu arredor non deixa que pase auga abondo, e recoller as súas follas cando se caen, para que asfalto e asociados sigan co seu aspecto, sen ser colonizados pola natureza rexeneradora. Falan tamén as imaxes, sen ser recollido polas palabras que as acompañan, da necesidade que temos desa mesma natureza para a nosa adaptación a un entorno ó que non estamos afeitos. E falan do agrupamento, da sociedade, do estar xuntos, para solucionar problemas de todos, problemas comúns... ou, de xeito alternativo, sufrir eses problemas en conxunto -aínda que, a este respecto, sabemos que polo momento sempre hai xente que sofre máis e outra que sofre menos-. Por suposto, a máis das cousas que as imaxes non indican de xeito explícito, pero están aí, como o seren acubillo de vida e formar parte do ecosistema de diversos animais.

    Esas imaxes falan dunha viaxe clara. Da Utopía da Arcadia ou do Paraíso, con árbores que, espalladas, contribúen ó noso alimento a máis do equilibrio, harmonía e beleza do entorno, coas que estariamos integrados, pasamos á procura das árbores como último recurso, utilitario, ó que volvemos por necesidade. Por necesidade nosa nun mundo no que somos nós quen lles facemos a vida máis difícil. Si, tamén ás árbores, igual que a nós mesmos. Unha viaxe á distopía.

Corta na praza

Totem en Ribadeo

 Corta na praza

    Ribadeo, século XXI. Novembro. Ribadeo parece seguir os pasos de Madrid. Evidentemente, non en tamaño. Neste caso, en relación á natureza. Cando isto escribo, van tres semanas dende as cortas das árbores no Colexio Público Gregorio Sanz de Ribadeo. Algo que no seu momento me lembrou as cortas arboricidas de Madrid e o encher de asfalto ou semellante o lugar: menos natural, menos purificación de aire, menos protección contra os cambios de temperatura, adeus ás avantaxes de ter á vista ou pasear por un entorno natural, máis gasto... Pero máis que polo anterior, que teño que recoñecer que me comín as vantaxes (várrese mellor) lembroumo por outra cousa: pola falta de escoita da xente.

    Dende aquela, ten sucedido a 'limpeza' de árbores dunha praza, a de Pancho Maseda, e todas as olladas pósanse no parque, na 'Praza de España', a zona axardinada fronte á Casa do Concello, que din estaría sinalada para unha 'entresaca' próxima, que hai unha palmeira que está a morrer.

    Coido que, máis aló de sinalar feitos, cabería lembrar algunha cousa sobre os xa citados.

    Na evolución dunha vila como Ribadeo, os cambios son unha constante de xeito case obrigado. A construción do que é o actual C.P. Gregorio Sanz non se fixo baseada nunha corta de árbores, senón máis ben rodeada de novas plantacións, parte das que agora foron cortadas. Os exemplares cortados na praza de Pancho Maseda pasaron no seu momento non só a adornar, senón a facer máis humano ese espazo, que ó longo do tempo viu outras modificacións. O actual parque, sexa a zona de 'Parque de San Francisco' ou a coñecida como 'Praza de España', bebe o seu uso do antigo campo da feira, por moito que o nome tradicional de 'O Campo' vaia decaendo; un lugar que dende que os documentos gráficos dan testemuña, vese con árbores, aínda que, pola súa dedicación comercial, menos que na actualidade.

    As cortas no C.P. Gregorio Sanz teñen xerado fortes protestas a posteriori. Tivo que ser así porque ata que houbo evidencia, non houbo noticia, e moito menos consulta. Dos da Praza de Pancho Maseda, moitos menos e menos visibles, tampouco houbo consulta nin noticia. Do parque, polo momento, non hai noticia (nin consulta). Pero nestas circunstancias, que xa se chame ‘Praza de España’, evocando algo diferente a un parque, non dá lugar a tranquilidade.

    Non quero entrar en discusións diversas que se veñen dando, como digo, a posteriori. Sen poder substituír o que sería necesario diálogo anterior, claro. E sen poder aspirar a máis que a cambiar a forma de facer as cousas en diante. Os feitos pasados e os temores cara ó futuro, sinxelamente están aí e pódese aprender.

--

Novas relacionadas coa corta de árbores en Ribadeo en 2024.

As árbores tamén morren. Ás árbores tamén se llas mata.

Non fan falta incendios. Hai outros xeitos de matar árbores.
Esta semana foi dura para as árbores de Ribadeo. O coidado, din, esixe poda, aínda que na natureza non haxa tal e se coiden eles sós. E foron podados. Non entendo moito de poda, pero dá dor velos totalmente mutilados polo nacemento das ramas, mentres ó pé quedan os restos. Abaixo deixo fotos miñas dos plátanos do parque e cedidas por Carlos Cid do camiño do cemiterio. Alí, naquela zona de paseo coa ría ó fondo, a poda convertiuse para máis dun en tala. E visto os restos, non foi porque tiveran enfermidade.
Non sei, non preguntei se se queren retirar as árbores dalí (da beira esquerda baixando, nunha boa zona xa non había) despois de que anos atrás, despois de substituír os vellos, altos e frondosos existentes polos máis recollidos e de menos porte plátanos, o asfalto case afogara as raíces. O que si sei é que ao menos, houbo un cambio de criterio de conservación da masa arbórea na zona do cemiterio, e o que máis dun entendido, de motu propio, me dixo: algo parello a que era un arboricidio.
Técnicos terá o concello e técnicos asemade os que me comentaron, mais desacougo e pena si da. E comentarios si xenera.

No Parque San Francisco

En Clemente Martínez Pasarón

No camiño do cemiterio

NOTA INFORMATIVA DA PLATAFORMA EN DEFENSA E PROTECCIÓN DAS ÁRBORES DE RIBADEO

O teixo de Arante, árbore senlleira dada onte por desaufizada polo alcalde. Autor descoñecido

NOTA INFORMATIVA DA PLATAFORMA EN DEFENSA E PROTECCIÓN DAS ÁRBORES

O pasado mércores 12 de febreiro celebrouse unha nova asemblea da Plataforma en Defensa e Protección das Árbores na que se acordou dar unha nota informativa ca valoración das últimas novas e publicar os resultados da recollida de sinaturas via internet. Aquí referirémonos ao primeiro punto.

En primeiro lugar observamos algúns movementos e declaracións ou comentarios por parte do concello que nos levan a pensar que a nosa acción ten algún tipo de impacto no día a día ribadense.

Por exemplo, recollemos unhas declaración (personais) do Sr. Alcalde nas que, segundo as nosas fontes, non se van tocar os contenedores das vivendas sociais. Se esto se confirma sería unha boa nova porque eses aparellos están dando un bo servizo e sería mágoa que se suprimisen. Naturalmente, hai que anotar este detalle na movilización da veciñanza e nas sinaturas recollidas nos días pasados.

Outro dato a suliñar é a retirada de maleza que se estivo facendo en algunhas ribadas, concretamente xunto do restaurante San Miguel, onde puidemos observar que tamén se provocou o desprendemento e derrubamento de pedras e terra, o que dá que pensar que cecais os técnicos non andiveron moi afinados.

Mais sorprendente da finura dos técnicos foi o sulfatado de alguhnas palmeiras no parque o venres, sete de febreiro, a media mañá, cando chovía a mares e ventaba sen conto, e polo tanto, os eventuais beneficios do tratamento foron parar ao chan en poucos segundos. Por certo, esta actuación levouse a cabo sen protección algunha coas consecuencias que nos podemos imaxinar.

Outra sorpresa xurdiu ao comprobar que na reforma da Praza de Pancho Maseda (entre o Concello e a Aduana) non se deixou ningún paso para as ambulancias, que segundo a declaración grabada do Sr. Alcalde, era un dos motivos da obra. Ainda ben, o paso que había antes quedou obstruido por un bloque de granito para suxetar unhas bandeiras. Unha contradicción mais nun relato inverosímil.

E para rematar, lembramos que no pleno do día 4 de febreiro o Sr. Alcalde referiuse repetidamente ao teixo da eirexa de Arante, suxerindo, anque non o dixo claramente, que hai anos fora obxecto dalgunha actuación impropia ou prexudicial. Como consecuencia, desprazámonos a visitar o teixo de Arante e a sacarlle unhas fotos, e puidemos observar que presenta un aspecto magnífico, por non dicir esplendoroso, como sempre.

E sen mais que comentar, suliñamos que segue sen haber información oficial sobre o proxecto de reforma do Parque Municipal e do Campo de Santa María, e que seguirémonos xuntando e tratando de levar adiante accións para preservar e mellorar as árbores e zonas verdes de Ribadeo e daremos información pública de canto nos vaia chegando. Proximamente daremos outra nota co resultado das sinaturas vía internet.

PLATAFORMA EN DEFENSA E PROTECCION DAS ÁRBORES

Ribadeo, 19 de Febreiro de 2025

Das novas árbores en Rodriguez Murias

Despois do xaleo montado este ano a conta das árbores da rua peonil, a plantación de novo en toda a liña da rua a outra semana devólvelle á rúa un aspecto máis común, parello ó que tería coa vexetación anterior nestes meses.
Non sei se zanxará a polémica, que xa foi moito a menos, pero sei que o coidado e a reposición de árbores é algo que nos atinxe, e que polo tanto debemos estar ó tanto e coidar.
Por certo, a foto de abaixo amosa un oco vacío: non é só que houbera que sacar as raíces das árbores anteriores para deixar espazo, senón tamén renovar a terra para evitar contaminación da enfermidade.
Mentras, a foto de arriba lembra que en Ribadeo existe un cine-teatro que é decorativo, pero cun uso moi limitado, cando outros espazos públicos (o parque) están sobreexplotados e adicados a cousas que non están moi relacionadas co seu uso principal.

Informe sucinto: 'actuación' no Gregorio Sanz

Informe sucinto: 'actuación' no Gregorio Sanz

    Informe realizado cos datos dispoñibles de xeito público na mañá do 5 de novembro de 2024.

    Feito que cobre o informe: Corta de árbores. Tala de diversos exemplares.

    Lugar: Colexio público Greogrio Sanz

    Momento no que se constata a actuación: mañá do 5 de novembro de 2024.

    Criterio seguido: descoñecido de xeito público

    Motivo: non se coñece xustificación (ver 'Futuro do terreo' e 'Uso actual do terreo')

    Execución da corta: empresa privada contradada polo concello, titular da propiedade

    Idade das árbores: variable, en todo caso, plantados o século pasado.

    Uso actual do terreo: patio e xardín para xogos e esparcemento do alumnado

    Futuro do terreo: dise que para facer un xardín

    Informe técnico: parece ser que favorable

    Opinión de usuarios, pais e sociedade en xeral: descoñecida

    Nota complementaria e comentario ó final

     Nota: 

    Citación difundida nas redes sociais: "Ante a desagradable sorpresa que nos levamos hoxe pola mañá al levar as nosas crianzas o cole e descubrir que o que parecía ser unha poda dos árbores do patio estase convertindo nunha corte dos mesmos, que xa está afectando a moitos dos exemplares  que forman parte da historia do colexio desde os seus inicios e que vai afectar a moitos mais, queremos convocar a todas as familias que poidades estar preocupados por esta medida a reunirnos hoxe a hora de recollida (3:30-3:45) diante do edificio do profesorado, para transmitirlle o noso malestar a dirección pola situación e pedir o Concello que reflexione sobre a misma e si realmente e neceseraria e axeitada"

    Comentario:

    A feito pasado, corta realizada, coido que a reflexión sobre a necesidade e axeitamento pouco pode aportar cara ó futuro.

--

Novas relacionadas coa corta de árbores en Ribadeo 2024.

Fomento: herbicidas e mal mantemento das estradas. Artigo de J.A. Salvatierra Rico

O Ministerio de fomento ten unha oficina de demarcación de estradas do Estado para Galicia na cidade de A Coruña , e unha unidade de estradas en cada unha das capitais de provincia , que funcionan como Xefaturas Provinciais. Parecería que con esta organización territorial, debería existir unha coordinación entre as catro provincias a hora de afrontar os traballos de conservación ou inversión. Na realidade non é asi. Cada Xefatura Provincial organiza os traballos a súa maneira, polo que se ve o percorrer as estradas de cada provincia.
Dicir que o Ministerio de Fomento non executa obras cos seus medios. Contrata todo con empresas. Teoricamente fai a supervisión das obras. Logo demostrarei, que nin esa vixilancia se realiza correctamente.
Voume referir en especial , o que Fomento fai na provincia de Lugo, tanto nas estradas nacionais, coma nas autoestradas, da súa competencia. Porque hai unha diferencia enorme, respecto o que fan as provincias limítrofes, como son Asturias, A Coruña e León, por onde limita por exemplo cas Autoestradas.
Cando un viaxa pola autoestrada ou por a N-VI dende A Coruña cara a Lugo , atopase que o chegar o limite de provincias , no concello de Guitiriz, ocorre o seguinte : na zona de A Coruña está feita a limpeza con desbroce mecánico (con desbrozadora), e na de Lugo con herbicida total. Facendo dúas aplicacións por ano , pulverizando cunetas, beirarúas e as partes baixas dos taludes. Este mesmo procedemento se repite nas estradas nacionais, por toda a provincia de Lugo. Asi o podemos ver na N-VI, na N- 634, N-642, N- 640, etc, etc, por toda a provincia, nas estradas da súa competencia. Seguindo cara a Asturias, o chegar o limite de provincia isto volve a cambiar, e aquí se desbroza. O mesmo ocorre en dirección a León. En Fomento declaran a Lugo provincia independente. ¡¡Por algo se comeza…!!
Pero para mal, nisto en concreto.

Mapa recollido da gl.wikipedia.org

Que consecuencias acarrexa aplicar herbicida, no lugar do desbroce?. Primeiro, e o máis visible, un gran impacto ambiental. Segundo, o aplicar herbicida de traslocación, as raíces das plantas inchan, aumentan de volume, levantando o terreo, sécanse as distintas plantas, producíndose erosión no chan cando veñen as choivas. Terceiro, ditas choivas por arrastre, levan todo ese veleno para os rios, regatos, fontes e mananciais. Cuarto, destrución de taludes e máis contaminación difusa, que é a que se produce por percolación da auga, misturada co herbicida, chegando logo as capas freáticas do solo. Quinto, no momento da aplicación de dito herbicida, por pulverización, chega a afectar a cultivos , setos, xardíns próximos os limites de ditas estradas, levado o liquido polo vento. Dispoño de fotos que asi o testemuñan. Pensemos que son centos de km con esta mala práctica.
Inversións contraditorias
Fomento realiza inversións contradictorias. Vexamos: Cando executan as Autoestradas, para fixar os taludes novos , gástanse miles de euros sementando herba, con maquinaria especial de proxección e sementeira, misturada con un pegante especial, para que se quede alí retida, ata que enraíce, xa que non se pode facer manualmente. Logo cando esa herba nace e medra, xunto con outras espontáneas, para suxeitar os taludes, vai e aplícalle herbicida pola base para que se veña abaixo cando chova. Vostedes entenden ós técnicos de Fomento?. Pois aínda o entenderán menos se lles digo, que na Administración central, hai outro ministerio que ten competencias en medio ambiente. Este debería apoiar o que leva o seu nome e a sostibilidade do mesmo, e o outro “fomenta” a destrución do anterior e sobre todo fomenta o mal exemplo do que non se debería facer. Neste apartado Lugo destaca polo negativo.
As Deputacións de Lugo e a de A Coruña desbrozan as súas estradas, e non aplican herbicidas. Estradas de competencia da Xunta de Galicia tamén comezaron con herbicidas fai dous ou tres anos. Os concellos de momento tamén desbrozan. Volvendo a Fomento, non queda aquí a cousa, hai máis en negativo. Na parte alta que fan desbroce nos taludes, seguimos na provincia de Lugo, como non os realizan ca frecuencia adecuada, as distintas plantas e árbores que medran aí, son tan grandes e as ramas tan gordas, que cando as cortan as deixan tiradas nas cunetas, e nas taxeas, obstruíndo estas e impedindo que circule a auga. Ou sexa todo o contrario do fin que se debería perseguir. Gástanse millóns de euros para facer este mal traballo. Contratan empresas e lles pagan para destruír , contaminar e atrancar as cunetas e taxeas. Traio aquí o que dicía o principio, onde está o control por parte de fomento dos traballos realizados polas empresas. Miren como están as cunetas no tramo, por exemplo no tramo de a Veiga a Ribadeo. Ou na saída de Meira a Lugo a esquerda despois da gasolineira. Eso non é cuneta, é un almacén de leña.
Rotondas, taludes e áreas verdes
Outro exemplo, na rotonda da Vilavella, a cuneta onde desemboca o rio que ven de Ove, está chea de maleza dende hai anos, así como o entorno desta rotonda ca circunvalación. Podería seguir así varias páxinas máis, que material hai, pero sería de nunca rematar e cansaría ós leedores. Por non falar das árbores que deixan medrar nos taludes, como pinos, eucaliptos, e outros. As rotondas en xeral están mal coidadas. Se limita Fomento a facer 2-3 cortes o ano, sen ningún tipo de planta ornamental, de distintas especies e cores como teñen algunhas cidades ou algúns concellos. En algún caso deixan medrar tanto a maleza nas súas rotondas que impiden a visibilidade os condutores. Os responsables de fomento non teñen a máis mínima sensibilidade ó “verde”, á limpeza e ó medio ambiente. Feitos falan. Circulen e vexan o que fan por exemplo no Pais Vasco. O mal e pouco traballo que realiza Fomento no mantemento das estradas da súa competencia e lamentable. Taxeas atascadas de terra e pedras. Lixo de todo tipo nas cunetas, sinais rotas ou arrincadas. Vexan senón o tramo de Ribadeo á Veiga. Esos chantos brancos de 1 m de alto, situados a distancia de entre 10-12 m a ámbolos lados da beirarúa, cantos están rachados, tirados ou que faltan. Se xa sabían que non os ían repoñer, para que os colocan?. Ademais estorban para o desbroce. É lamentable.
Cando pasen polo tramo de autoestrada, o último que se abriu en Galicia, entre Lourenzá e Abadín, fíxense no entorno da saída de Pastoriza – Riotorto, onde fixeron unha superficie verde, plantaron abondas árbores con alturas de máis de 3-4 m, pero colocándolles titores de madeira de pino demasiado delgados e tan só de 1-1,5 m de alto. Consecuencia, que esas árbores están arqueados, por ser o titor baixo e débil para ese porte, e varias están secas. Iso que a plantación debería saír adiante, pois foron plantados a finais do inverno.
Pero os traballos foron mal feitos. Falta de terra vexetal, malos titores e mala inmobilización do titor ca árbore. Vai facer un ano que se abriu este tramo, pero non se fixo mantemento ningún nesta zona verde.
Falta de mantemento das estradas e das autoestradas
Fixémonos de novo nos tramos galegos. O pouco mantemento que se fai, tan só está restrinxido a aplicar herbicida nas beirarúas, cunetas e base de taludes, e moi pouco desbroce mecánico nesta franxa. Pero se nos fixamos un pouco, dende aquí para fora, poderemos ver como a malla de peche está cuberta de maleza de todo tipo, como toxos, xestas, silvas, codesos, salgueiros en zonas molladas, pinos, eucaliptos, etc, etc, de tal maneira, que o peche na maioría do percorrido está cuberto por dita maleza. Esto que supón? Que tanto a malla como os chantos que a soportan, o estar nun ambiente “húmido”de forma case permanente, co que chove en Galicia, isto da lugar a unha oxidación rápida do material, ó non secar por falta de ventilación e de luz. O mesmo tempo non se pode facer unha revisión do estado de conservación do peche, e isto traerá consecuencias para a seguridade da estrada, ó ser cada vez máis vulnerable a entrada de animais na vía. Ó non limpar o peche no seu debido tempo, agora non se pode facer con maquinaria, pois non se ve por onde vai, e se rompería tanto a malla como as máquinas. Non atoparían empresa que quixera facer este traballo. Poderíase facer manualmente, pero saería moi caro. E iso sabemos que non se vai facer. Isto traerá roturas nas zonas de vaguadas e pasos de regatos, as máis vulnerables, por onde entrarán animais salvaxes de todo tipo, e mesmo domésticos, que aumentarán os accidentes. Ata que volvan os accidentes con mortos non se fará nada. Como pasou o ano pasado na data de 26 de xullo no alto do Fiouco, cun morto e varios feridos. Despois empezaron as melloras de seguridade, despois da morte da rapaza de Foz.
Aínda quero anticiparme a resaltar outra cousa máis, que traerá consecuencias para o futuro. Non se están a cortar ou arrincar as árbores que nacen nos taludes, como eucaliptos e pinos principalmente, que medran a unha velocidade, no caso do eucalipto, de máis de 1,5-2 m por ano, pero que enraízan mal por falta de solo, e que cando teñen por enriba de 10-12 anos quedan expostos a ser derribados por ventos fortes na estrada, con risco de accidente grave, tendo en conta a velocidade que se circula.
Podemos concluír, que o mantemento que fai Fomento das estradas é malo ou moi malo, tanto para a seguridade das persoas como para o medio ambiente. Non vou entrar do mal gusto que teñen no coidado das zonas verdes das rotondas. Mal segadas e sen plantas ornamentais. Que se fixen nas estradas do Pais Vasco, das Francesas, Inglesas, etc. Somos os da cola de Europa. Os Portugueses as teñen mellor coidadas ca nos, e son máis pobres en renda.
Para rematar, voulles a contar unha anécdota que me sucedeu ca Garda Civil de Tráfico. Estaban parados ó lado dunha rotonda. Achégome para dicirlles que había cerca de alí onde estaban eles un indicador de Stop derribado, desde facía algúns días, e que iso podía ser perigoso. Gracias, me responderon, pero no nos fale vostede de Fomento, non hai organismo que peor traballe. Non fan mantemento ningún. Se o saberemos nós que andamos tódolos días polas estradas. Saquen as súas conclusións, e que non lles pase nada cando volvan a saír ás estradas.